اشیاء:
انناس ایک عدد
بادام کی گری آدھا چھٹانک
چاول پرانے باسمتی ایک کلو
زعفران آدھا ماشہ
لیموں ایک عدد
گھی آدھا کلو
دودھ آدھا پاؤ
شکر دو کلو
کشمش دو تولہ
ترکیب:
دوسیر پانی میں انناس کے ٹکڑے کر کے ڈال دیں اور ابال لیں۔ جب خوب عرق نکل آئے تو پانی کو چھان کر اسی میں شکر ملا دیں۔ قوام بنا کر دودھ کے چھینٹے دے کر صاف کر یں۔ جب تین چوتھائی پانی جل جائے تو ایک لیموں کا رس نچوڑ دیں تاکہ دانہ نہ پڑے۔ اس کے بعد چاولوں کو ایک گھنٹہ تک کسی برتن میں پانی میں بھگو دیں۔ اس کے بعد کسی دیگچی میں ڈال کر انہیں ابال لیں۔ ایک ماشہ زردے کا رنگ، الائچی ہری، پانچ عدد، لونگ پانچ عدد کسی باریک کپڑے میں رکھ کر پوٹلی بنا لیں اور اس پوٹلی کو چاولوں کو میں ڈال دیں تاکہ چاولوں کے ساتھ ابل کر ان کا عرق نکل جائے۔ بعدمیں یہ پوٹلی نکال دیجئے۔ جب چاولوں میں تین کتی رہ جائے تو ان کو کسی کپڑے میں چھان کر کسی دوسرے برتن میں ڈال دیں اور جو قوام تیار رکھا ہے اسے کسی بڑے چمچے سے اس طرح ڈالیں کہ ہر طرف پڑ جائے، پھر دیگچی کے سر پوش کو آٹے سے بند کر کے انگاروں پر لگا دیں۔
سر پوش پر بھی انگارہ لگا دیں۔ پھر جب بھاپ بھوٹنے لگے تو کھول کر دیکھیں اگر چاول گل گئے ہوں تو گھی ہر طرف چھڑک کر زعفران ملا دیں۔ سب آخر میں بادام کی ہوائیاں چھڑک دیں۔ کشمش ملانا ہو تو وہ بھی ملا دیں۔