آزادکشمیر، لوڈشیڈنگ کیخلاف احتجاج، پولیس کی کارروائی:
میرپور (اُردو پوائنٹ اخبار تازہ ترین ۔24مارچ۔ 2010ء) پاکستان واپڈا کی جانب سے آزاد کشمیر کے شہر میر پور میں روزانہ اٹھارہ گھنٹے کی طویل لوڈشیڈنگ کے خلاف شہر میں مکمل شٹرڈاؤن ہڑتال کی گئی جبکہ مظاہرے کے دوران مظاہرین نےٹریفک بلاک کردی . چوک شہیداں سے ہزاروں افراد پر مشتمل ریلی نے منگلہ پاور ہاؤس کے گھیراؤکی کوشش کی تاہم پولیس نے مظاہرین کو پاور ہاؤس تک پہنچنے سے روک دیا۔اس دوران مشتعل مظاہرین نے پولیس پر پتھراؤ کیا۔ پولیس نے مظاہرین کو منتشر کرنے کیلئے ہوئی فائرنگ اور آنسوگیس کی شیلنگ کی۔ جس کے باعث سے پانچ مظاہرین زخمی ہوگئے۔ اس دوران آزادکمشیر کابینہ کی رکن ناہید طارق جلوس لے کر پولیس ناکے پر پہنچیں تو ان پر بھی پتھراؤ کیا گیا۔ اس موقع پر ڈپٹی کمشنر میر پور اور مشتعل مظاہرین کے مذاکرات ہوئے اور پولیس نے ناکہ کھول کر مظاہرین کو پاور ہاؤس کی جانب جانے کی اجازت دیدی۔