بدعنوانی ثابت ہو تو پھانسی چڑھنے کیلئے تیار ہوں، وفاقی وزیر پانی و بجلی:
اسلام آباد (اُردو پوائنٹ اخبار تازہ ترین۔07اگست ۔2009ء) وفاقی وزیر پانی و بجلی راجہ پرویز اشرف نے کہا ہے کہ رینٹل بجلی گھروں کے پاکستان لانے کے منصوبے میں کسی قسم کی بدعنوانی ثابت ہو جائے تو وہ پھانسی پر چڑھنے کیلئے تیار ہیں، گذشتہ دور میں وراثت میں ملنے والے بجلی بحران پر قابو پانے کیلئے رینٹل بجلی گھر تیز ترین ذریعہ ہے، رینٹل بجلی صرف ایک سینٹ فی یونٹ مہنگی ہو گی، اپوزیشن ملک کو بحرانوں سے نکالنے کیلئے ہمارا ساتھ دے۔ جمعہ کو قومی اسمبلی میں بجلی بحران پر جاری بحث سمیٹتے ہوئے راجہ پرویز اشرف نے کہا کہ تھرکول 1992ء میں دریافت ہوا، آج وہاں جا کر انفراسٹرکچر بنایا جا رہا ہے، یہاں سے شنواء کمپنی کو کس نے بھگایا اس کا جواب دیا جائے۔ رینٹل بجلی گھروں سے بجلی نیشنل گرڈ میں آئے گی جس سے بجلی کی فی یونٹ قیمت میں 15 سے 20 پیسے اضافہ ہو سکتا ہے۔ انہوں نے کہا کہ ہمارا جینا مرنا پاکستان کیلئے ہے، ہم یہاں سے بھاگنے والے نہیں ہیں۔ جاپانی سسکو کمپنی سے زبردستی نرخ کم کرائے گئے۔ انہوں نے بین الاقوامی سطح پر مقدمہ دائر کر دیا۔ انہوں نے حلفاً کہا کہ میں درست اطلاعات ایوان کو دے رہا ہوں، اب حکومت کی شفافیت کی وجہ سے 4 ارب ڈالر کی سرمایہ کاری آئی ہے، بجلی بحران سے نمٹنے کیلئے پارلیمانی کمیٹی تشکیل دی گئی ہے، سسٹم جتنی بجلی پیدا کر رہا ہے اس کے باوجود ساڑھے تین ہزار میگاواٹ بجلی کی کمی ہے، ملکی مفاد میں ایک ہزار میگاواٹ بجلی سرپلس ہونی ضروری ہے۔ وفاقی وزیر پانی و بجلی راجہ پرویز اشرف نے بجلی بحران پر بحث سمیٹتے ہوئے کہا کہ پارلیمنٹ سب سے بڑا فورم ہے، یہاں پر تمام ابہام لائے جائیں تاکہ عوام تک سچائی آ سکے اور دودھ کا دودھ اور پانی کا پانی سامنے آ سکے۔ انہوں نے کہا کہ تنقید ہر رکن کا حق ہے۔ راجہ پرویز اشرف نے کہا کہ بجلی بحران کا حل نکالنے پر ہر ایک نے زور دیا، ہم یہ تسلیم کرتے ہیں کہ اس بحران کا حل نکالا جانا چاہئے، رینٹل بجلی گھروں کا معاملہ اٹھایا گیا ہے۔ یہ بحران ماضی کا دیا ہے، ہم پر الزامات لگانے والوں نے خود ماضی میں کرپشن پر سمجھوتہ کیا، ہمارا دامن صاف ہے۔ پرویز اشرف نے کہا کہ تمام الزامات صرف پوائنٹ سکورنگ ہے۔ رینٹل بجلی گھروں کی بجلی فی یونٹ صرف ایک سینٹ مہنگی ہے جو 13.5 ہے۔ انہوں نے کہا کہ اگر ایک پیسے کی کرپشن ثابت ہو تو میں پھانسی لگنے کیلئے تیار ہوں۔