بجلی نہ پانی، کاروبار نہ مزدوری: لوگوں کا سڑکوں پر آنا اتحادی حکمرانوں پر عدم اعتماد ہے، چودھری پرویزالٰہی:
اسلام آباد (اُردو پوائنٹ اخبار تازہ ترین۔21جولائی ۔2009ء) پاکستان مسلم لیگ کے سینئر مرکزی رہنما چودھری پر ویزالٰہی نے کہا ہے کہ مختلف مقامات باالخصوص کراچی اور پنجاب بھر میں بجلی کی لوڈشیڈنگ کے خلاف ہڑتالیں، مظاہرے اور پرتشدد احتجاج اس حقیقت کا ثبوت ہیں کہ لوگ بیروزگاری، مہنگائی، بدامنی اور گڈ گورننس کے نام پر لاقانونیت سے تنگ آ چکے ہیں اور انہیں یقین ہو گیا ہے کہ اتحادی حکمرانوں نے عوام سے جھوٹے وعدے کیے تھے۔ اپنے ایک بیان میں چودھری پرویزالٰہی نے صورتحال پر سخت تشویش کا اظہار کرتے ہوئے کہا ملک کو جنت بنانے کے سبز باغ دکھاے والوں نے حالات اس قدر خراب کر دئیے ہیں کہ بجلی ہے نہ پانی، کاروبار بند ہیں مزدوری نہیں ملتی، بھوک اور گرمی کی شدت سے تنگ آ کر سڑکوں پر نکلنے والے مظلوم عوام پر پولیس کے بدترین تشدد کی جتنی مذمت کی جائے کم ہے۔ نا اہل حکمرانوں اور صوبائی انتظامیہ کے چہیتے نا اہل مقامی حکام مظاہرین کو پرامن رکھنے کی بجائے اپنے غیر ذمہ دارانہ اقدامات کے باعث شرپسندوں کو توڑ پھوڑ کا موقع فراہم کرتے ہیں۔ انہوں نے کہا کہ دن بھر دکانیں کھلی رکھنے، فیکٹریوں میں حاضری اور محنت مشقت کے باوجود لوگ دو وقت کی روٹی بھی پوری نہیں کر پاتے اور پھر اس پریشانی کے ساتھ ساتھ لوڈ شیڈنگ کے باعث نیند بھی پوری نہ ہونے سے لوگوں میں ڈپریشن بڑھ گئی ہے لیکن اتحادی حکمران ان کے مسائل پر کوئی توجہ نہیں دے رہے۔ پنجاب میں جہاں گڈگورننس کا سب سے زیادہ ڈھنڈورا پیٹا جا رہا ہے صورتحال سب سے زیادہ خراب ہے۔ حکومت مکمل طور پر ناکام ہو چکی ہے۔ لوگوں کے سڑکوں پر نکلنے سے حکومت کے خلاف ان کی نفرت کا پتہ چلتا ہے۔ پاکستان مسلم لیگ پنجاب کے صدر نے مطالبہ کیا کہ بجلی کی لوڈ شیڈنگ فوری طور پر ختم کی جائے۔ مہنگائی، بیروزگاری اور مہنگائی کے خاتمہ کیلئے فوری اور موٴثر اقدامات کیے جائیں گرفتار مظاہرین کو فوری طور پر رہا کر کے زخمیوں کی مالی امداد کی جائے اور نا اہل انتظامی افسروں کے خلاف کارروائی کی جائے۔