وفاقی وزیر کے90فیصد علاقوں میں بجلی کی بحالی کے دعوے کے بر خلاف شہر کا60 فیصد حصہ پیرکو بجلی سے محروم رہا:
کراچی (اُردو پوائنٹ اخبار تازہ ترین۔20جولائی۔2009ء)وفاقی وزیر برائے پانی و بجلی راجہ پرویز اشرف کی جانب سے کراچی کے90فیصد علاقوں میں بجلی کی بحالی کے دعوے کے بر خلاف شہر کا60 فیصد حصہ پیرکو بجلی سے محروم رہا،دوسری جانب کے ای ایس سی کے ترجمان نے وفاقی وزیر پانی و بجلی کے بیان پر کہا کہ وفاقی وزیرکے بیان سے شہر میں مزید آگ لگ سکتی ہے۔کراچی میں ہفتہ کی رات سے ہونے والی بارش میں کے ای ایس سی کے تمام بلند و بانگ دعوے برسات کے پانی میں بہہ گئے اور مون سون کی تیاریوں کے حوالے سے کے ای ایس سی حکام کی یقین دہانیاں دھری کی دھری رہ گئیں۔شہر کا بڑا حصہ پیر کو بھی بجلی سے محروم رہا۔ نیشنل گرڈ سے بجلی کی فراہمی بحال ہونے کے باوجود ابھی تک کے ای ایس سی اپنے پاور جنریشن اور ڈسٹری بیوشن سسٹم کو چلانے اور مکمل طور پر بجلی بحال کرنے میں ناکام ہوگئی ہے اور پیر بھی شہر کے کئی گرڈ اسٹیشن بند ہیں۔ ریلوے ریتی لائن، گارڈن ،رنچھوڑلائن،جوبلی،سوک سینٹر، جیکب لائن، لیاری، ،ملیر، بہار کالونی بلاک اے ، کورنگی اللہ والا ٹاون، پی آئی اے ٹاون، ڈیفنس فیز5، لاائنز ایریا ، صدر ، کلفٹن، ڈیفنس، کورنگی انڈسٹریل ایریا ، ملیر ، ماڈل کالونی اور گرین ٹاون کے علاقے بجلی سے محروم تھے۔جبکہ کورنگی انڈسٹریل ایریا میں گزشتہ48 گھنٹوں سے بجلی کی معطلی کے باعث اسٹینڈ بائی جنریٹرز نے بھی کام چھوڑ دیا۔ دوسری جانب شہرکو بلک میں پانی فراہم کرنے والے دھابیجی پر بجلی کی فراہمی گزشتہ48 گھنٹوں سے معطل ہے ، حب کینال کا شگاف ابھی تک پر نہیں کیا جاسکا۔ جس کے باعث حب سے بھی پانی کی فراہمی معطل ہے۔جبکہ شہر کی سب اہم ترین شاہراہ ایوان صدر روڈ سے اب تک نکاسی آب نہیں کیا جاسکا۔ایوان صدر روڈ پر گورنرہاوٴس واقع ہے جبکہ اس کے بائیں ہاتھ پر سپریم کورٹ اور دائیں ہاتھ پر وزیر اعلیٰ ہاوٴس موجود ہے اور ایوان صدر روڈ کے عقب میں سندھ اسمبلی بلڈنگ ہے۔کراچی کی اتنی اہم ترین شاہراہ ہونے کے باوجود تاحال اس سڑک کو بارش کے پانی کی نکاسی نہیں کی جاسکی ہے۔ تاہم کراچی کی کئی سڑکوں سے جن میں آئی آئی چندریگر روڈ،شاہراہ فیصل،گلشن اقبال،کوریڈور نمبر2سے اور دیگر علاقوں سے بارش کے پانی کی نکاسی کی جاچکی ہے۔دوسری جانب شہریوں سے بجلی کی عدم فراہمی اور پانی بند ہونے پر شدید احتجاج کیا ہے۔