کینیڈین سفیر کی وزیر پانی وبجلی سے ملاقات ، کینیڈا کا بجلی وپانی کے منصوبوں میں سرمایہ کاری میں دلچسپی کا اظہار:
اسلام آباد (اردوپوائنٹ اخبا ر تازہ ترین13جنوری2009 ) کینیڈا کے سرمایہ کاروں نے پاکستان میں پن بجلی اوردیگر منصوبوں میں سرمایہ کاری بڑھانے میں گہری دلچسپی کا اظہار کیا ہے ، پاکستان میں کینیڈا کے ہائی کمشنر رینڈولف مینک نے منگل کو یہاں وزیر پانی وبجلی راجہ پرویز اشرف سے ملاقات کی اور ان سے مختلف شعبوں میں تعاون بڑھانے پر تبادلہ خیال کیا، وفاقی وزیر نے بتایا کہ بجلی کے شعبے میں سرمایہ کاری کے وسیع مواقع موجود ہیں ، حکومت کی مراعاتی آزادانہ پالیسی سے سرمایہ کار بھرپور فائدہ اٹھا سکتے ہیں ، انہوں نے یقین دلایا کہ پاکستان میں کینیڈا کے سرمایہ کاروں کو ہر ممکن سہولیات فراہم کی جائیں گی، انہوں نے کہا کہ دسمبر 2009ء تک حکومت ملک سے لوڈشیڈنگ ختم کرنے کا عزم کئے ہوئے ہے ، اس مقصد کیلئے رینٹل پاور پراجیکٹس اور دیگر منوبوں پر تیزی سے کام جاری ہے ، 2016ء تک حکومت 35 ہزار میگا واٹ بجلی پیدا کرنے کی منصوبہ بندی کررہی ہے ، کینیڈین ہائی کمشنر نے بتایا کہ کینیڈین کمپنیاں مختلف شعبوں میں سرمایہ کاری کررہی ہیں اور وہ بجلی کے شعبے میں بھی گہری دلچسپی رکھتی ہیں ، ملاقات کے دوران ہائی کمیشن کے سینئر پریڈ کمشنر میری لین میک لین ڈینٹن بھی موجود تھے ۔