کیری لوگر بل کا مقصد پاکستان کے عوام کی مدد کرنا ہے، شیلا جیکسن لی:
واشنگٹن(اُردو پوائنٹ اخبار تازہ ترین۔10اکتوبر۔2009ء)امریکی کانگریس میں پاکستانی کاکس کی کوچیئرپرسن شیلاجیکسن لی نے کہا ہے کہ کیری لوگر بل کا مقصد پاکستان کے عوام کی مدد کرنا ہے، امید ہے پاکستان کی پارلیمنٹ بل کی منظوری دیدے گی۔واشنگٹن میں گفتگو کے دوران شیلاجیکسن نے کہا کہ پاکستان میں کچھ لوگ کیری لوگر بل کو قومی خودمختاری کیلئے خطرہ سمجھتے ہیں تاہم انہوں نے ان کے ساتھیوں نے یہ بل پاکستانی عوام کی مدد کیلئے بنایا ہے۔ پاکستان القاعدہ کیخلاف امریکہ کا اہم اتحادی ہے اور کیری لوگر بل کے تحت امدادی پیکج سے دونوں ملکوں کے درمیان اسٹریٹیجک تعلقات میں مزید اضافہ ہوگا۔ شیلا جیکسن نے بل کو قبول کرنے کے متعلق پاکستان کی پارلیمنٹ میں بحث کو خوش آئند قراردیتے ہوئے کہا کہ یہ جمہوریت کا صحت مند اظہار ہے۔ ان کے مطابق کیری لوگر بل سے پاکستانی عوام کیلئے تعلیم، جمہوریت اور معاشی ترقی کے اہم مواقع پیدا ہوں گے۔ شیلا جیکسن نے کیری لوگر بل کی تیاری میں اہم کردار ادا کیا ہے ۔