مسلم لیگ (ن) اور دیگر سیاسی جماعتوں کی کارکردگی میں واضح فرق عوام کے سامنے ہے، کارکردگی کی سیاست پر یقین رکھتے ہیں،حکومت ہر شعبہ کی ترقی کیلئے بہترین حکمت عملی کے ساتھ عملی کام کر رہی ہے

ننکانہ صاحب ۔ (اُردو پوائنٹ اخبارتازہ ترین - اے پی پی۔ 21 فروری2017ء) وفاقی وزیر برائے امور کشمیر و گلگت بلتستان چوہدری محمد برجیس طاہر نے کہا ہے کہ مسلم لیگ (ن) اور دیگر سیاسی جماعتوں کی کارکردگی میں واضح فرق عوام کے سامنے ہے، آج حکومت کے ساڑھے تین سال کا عرصہ گزرنے کے بعد عوام خود اس امر کی گواہی دے رہے ہیں کہ ان تین سالوں میں پاکستان نے نہ صرف شاندار ترقی کا سفر طے کیا ہے بلکہ حکومت عوام کے بنیادی مسائل کے حل اور زندگی کی بنیادی ضروریات کی فراہمی کے اہداف بھی احسن طریقے سے حاصل کر رہی ہے۔

انہوں نے یہ بات ضلع ننکانہ کی تحصیل سانگلہ ہل کے نواحی قصبے جھوگیاں میں گیس فراہمی کی افتتاحی تقریب سے خطاب کرتے ہوئے کہی۔ انہوں نے کہا کہ انفراسٹرکچر کی ترقی کا کام پورے ملک میں زور و شور سے جاری ہے اور سوست تا گوادر عظیم و شان ذرائع مواصلات کی ترقی سے ایک طرف پاکستان کے مختلف صوبوںمیں رہنے والے عوام ایک دوسرے کے قریب آ رہے ہیں جس سے قومی یکجہتی میں زبردست اضافہ ہو رہا ہے جب کہ دوسری جانب معاشی ترقی کی ایک مستحکم بنیاد کی راہ بھی ہموار ہو رہی ہے۔

(جاری ہے)

چوہدری محمد برجیس طاہر نے کہا کہ مسلم لیگ (ن) کارکردگی کی سیاست پر یقین رکھتی ہے اور یہی وجہ ہے کہ حکومت ہر شعبہ کی ترقی کیلئے بہترین حکمت عملی کے ساتھ عملی کام کر رہی ہے۔ انہوں نے کہا کہ جن صوبوں میں مسلم لیگ (ن) کی حکومت ہے وہ صوبے عوام کو بنیادی سہولیات کی فراہمی اور ان کے مسائل کے حل کے سلسلہ میں دوسرے صوبوں سے کئی گنا آگے ہیں۔

انہوں نے کہا کہ اس کی وجہ محمد نواز شریف کا وژن اور مسلم لیگ (ن) کی خلوص نیت سے اپنی فرائض کی ادائیگی ہے۔ انہوں نے کہا کہ افسوس اس امر کا ہے کہ تحریک انصاف جیسی جماعتیں جن کو عوام نے ووٹ اپنے مسائل کے حل کیلئے دیئے۔ انہوں نے اپنی تمام تر توانائیاں مسلم لیگ (ن) کو اس کے ترقی کے ایجنڈے سے ڈی ریل کرنے میں صرف کر دیں۔ انہوںنے کہا کہ عمران خان اور ان کی سیاسی جماعت اپنے دھرنوں اور احتجاج کی بدولت پاکستان کے خوشحالی کے سفر میں کچھ دیر تک روکاوٹ ڈالنے میں تو کامیاب ہوئے لیکن حکومت کے پختہ عزم کے باعث وہ حکومت کو ترقی و خوشحالی کے ایجنڈے سے ڈی ریل کرنے میں ناکام رہے۔

انہوں نے کہا کہ حکومت کی شاندارکارکردگی کا صلہ آج عوام کے اعتماد اور یقین کی صورت میں سامنے آ رہا ہے۔ وفاقی وزیر نے کہا کہ حکومت اپنی باقی مائندہ مدت میں امن وامان ،توانائی اور معاشی ترقی کے تمام تر اہداف حاصل کر کے عوام کی عدالت میں ایک مرتبہ پھر سرخرو ہو گی اور مخالفین کو اپنے ذاتی ایجنڈوں کی تکمیل میں ناکامی کا سامنا کرنا پڑے گا۔