میری آنکھوں میں آنسو مچلتا رہا چاند جلتا رہا
میری قسمت کا تارا بدلتا رہا چاند جلتا رہا
اُن کے انوار کی تاب لانہ سکا جھلملا نہ سکا
آئنہ میرے دل کا پگھلتا رہا چاند جلتا رہا
چھم چھم اشکوں کی بر سات ہوتی رہی رات روتی رہی
دردِ دل میرا شعروں میں ڈھلتا رہا چاند جلتا رہا
تِیر اُنکی نگاہوں کے چلتے رہے رُخ بدلتے رہے
وار تر چھی نگاہوں کا چلتا رہا چاند جلتا رہا
سامنے میری آنکھوں کے بیٹھے رہے مسکراتے رہے
خواب اجمل حقیقت میں ڈھلتا رہا چاندجلتارہا