ہم بھی کیسے ہیں ترے عشق میں ناداں جاناں
تیر ی نفرت کو بھی سمجھے ترا احساں جاناں
کوئی پُرسانِ غمِ دل نہ کوئی مونسِ جاں
کیا قیامت ہے یہ شامِ شبِ ہجراں جاناں
اک ترا حُسن غضب ،اک تری آنکھیں قاتل
کون ہے جو رہے ایسے میں مسلماں جاناں
دل یہ کہتا ہے کہ ہے بِن مرے تُو بھی تنہا
دل کی کیا بات کہوں دل تو ہے ناداں جاناں
دو قدم آنے کی زحمت نہ کبھی فرمائی
کبھی پورا نہ کیا دل کا یہ ارماں جاناں
زندگی ساری کٹی تیرے غموں میں لیکن
وقتِ رخصت تو نہ کر دل کو پریشاں جاناں
کب سے ہوں منتظرِ دید ترے رستے میں
اب تو ہو جائے گزر سُوئے غریباں جاناں
کس کی آمد کے سبب خانہء اجمل مہکا
کر گیا کون مرے گھر کو گلستاں جاناں