مری خو میں کج کلاہی، یہاں رسم بادشاہی
مجھے راس آ نہ پایا، یہ جہانِ مرغ و ماہی
نہ تو صاحبِ خبر میں، رہی رمزِ خیر خواہی
نہ ہی صاحبِ نظر میں کوئی شانِ یک نگاہی
نہ کرید میری حالت، پسِ وعظ و پَند ناصح
کہ عراقِ دلسَتاں کو نہیں چاہیے گواہی
پلے جس میں سوزِ امّت، وہ جگر کہاں سے آئے
تری ذات تک رہی ہے، تری آہِ صبح گاہی
مجھے رغبتیں سکوں سے، تجھے نسبتیں جنوں سے
مری منزلیں محبت، تو کدورتوں کا راہی
تو سمجھ اگر غنیمت، ہے ضیائے روزِ فرقت
رخِ شامِ وصل پر ہے، شبِ تار کی سیاہی
بڑھی شورشِ زمانہ، مٹا رنگِ دلبرانہ
جو تھے قائدینِ ملت، بنے کفر کے سپاہی
مجھے مت سنا ترانہ، کوئی عہدِ فصلِ گل کا
نظر آ رہی ہے مجھ کو، تو عظیم تر تباہی