جاں بہ لب ہے مرا دلِ ناساز
طائرِ روح مائلِ پرواز
مانگتا ہے وہ مہلتِ سجدہ
گم ہے دھڑکن، نحیف تر آواز
گویا ہوتا ہوں میں تفاخر سے
اے! کہ قلبِ سلیم و مایہٴ ناز
عمر تو نے گزاری مسجد میں
اور ادا کی ہے پنجگانہ نماز
کیوں تڑپتا ہے ایک سجدے کو
دل لگی کا ہے یہ عجب انداز
دل یوں کہتا ہے آہ بھر کے مجھے
سُن اے محرومِ رسمِ عشقِ ایاز
مشقِ آداب ہیں صلوٰة و قیام
تاکہ پیدا ہو عجز و سوز و گداز
عمر تو نے گزاری مسجد میں
دمِ آخر میں کھولتا ہوں راز
تو جھکاتا رہا جبینِ مجاز
جھک نہ پائی کبھی جبینِ نیاز