کالی آنکھیں نیلے خواب
خوابوں میں بھی دیکھے خواب
نیند میری پلکوں پہ جاگی
کتنی جلدی میں تھے خواب
دونوں ہی مشہور بہت ہیں
تیری آنکھیں میرے خواب
پہلے دیکھی تھی تعبیریں
بعد میں ہم نے دیکھے خواب
صبح ہوئی تو میں نے دیکھے
سلوٹ سلوٹ بکھرے خواب
ہر دن تیری یاد میں گزرا
ہر شب دیکھے تیرے خواب
عشق سمجھ میں کب آتا ہے
جیون چھوٹا لمبے خواب
اپنے ہاتھوں سے دفنائے
سب نے اپنے اپنے خواب
میری بستی میں رائج ہیں
کچی نیندیں پکے خواب
دنیا سمجھے میں شاعر ہوں
میں نے تو بس دیکھے خواب