میرا منصف تھا کوئی حکم سناتا مجھ کو
میں جو مجرم تھا تہہ خاک ملاتا مجھ کو

چھوڑئیے بات مقدر پہ نہ ڈالیں ایسے
اسکو چاہت تھی تو پھر اپنا بناتا مجھ کو

ایک حسرت سی نگاہوں میں اتر آئی ہے
آئینے ہی میں کبھی عکس دکھاتا مجھ کو

چھوڑ دیتا یا کوئی ربط بڑھاتا مجھ سے
فیصلہ جو بھی کیا تھا تو بتاتا مجھ کو

عمر گزری ہے میری دھوپ میں جلتے جلتے
وہ کسی روز تو آنچل میں چھپاتا مجھ کو

راز آنکھوں سے ذرا بوجھ تو ہلکا ہوتا
اپنا غم دے کے کسی روز رلاتا مجھ کو