Jugnuon Ke Des Mein By Saif Ali Butt

اک روشنی جو میرا نشاں تھی، اک روشنی جو میری پہچاں تھی

اک روشنی جو کہ کہکشاں تھی، اک روشنی جو میرا جہاں تھی

وہی روشنی کہیں گم گئی ہے، تاریکیوں میں کہیں چھپ گئی ہے

تیز آندھیوں نے کیا گل اسے، میں ہوں ڈھونڈتا ہر پل اسے

جہاں زندگی پہ عروج تھا. جہاں بحر بھی پرموج تھا

جہاں تتلیاں تھیں مکیں کبھی. جہاں پھول تھے رنگیں سبھی

جہاں شوخ بھنورے تھے دلنشیں. جہاں گل تھے سارے گلبدیں

جہاں جگنوؤں سے تھی روشنی. صوت بلبل میں تھی چاشنی

جہاں خوشبو تھی مسحور سی. ہر کلی سراپاء حور سی

جہاں صبح تھی پرنور سی. جہاں شام تھی پرسرور سی

جہاں چاند کا تھا بسیرا بھی. جہاں تاروں سے تھا سویرا بھی

پھر یوں ہوا سب بدل گیا. چال دجال اپنی وہ چل گیا

خوشیوں کا سایہ بھی ڈھل گیا. پھول کلیاں ساری مسل گیا

ہوا ظلمتوں کا یوں راج پھر. ہوا امن تخت و تاراج پھر

نہیں پاتا کوئی بھی جاء کہیں. ہے کھو گئی ہر راہ کہیں

کہیں گولیوں کی ہے گونج تو. ہے بو بارود کی جا بجا کہیں

لاشے پڑے ہیں یہاں چار سو. جینے کی نہیں کوئی آرزو

دھواں دھواں ہیں چراغ سارے. خزاں خزاں ہیں باغ سارے

لال و گوہر مل گئے خاک میں. صیاد ہے بلبل کی تاک میں

ہے موت محو رقص سرراہ یہاں. نہیں زندگی کو پناہ یہاں

مسکراہٹوں کا ہے مندہ یہاں. بنی موت بھی دھندہ یہاں

زمین و آسماں ہیں لرزاں یہاں. ہوا لہو آب سے ارزاں یہاں

انسان سوز یہاں سب ساز ہیں. سبھی کھوکھلے الفاظ ہیں

کیوں سلجھتے نہیں احباب سے؟ یہ پہیلیاں ہیں یا راز ہیں؟

اندھیری گلیوں کے تھے چراغ جو ہوۓ مبتلاء عذاب وہ

سنہری کلیوں پہ تھے شباب جو ہوۓ آشناء تیزاب وہ

ظلمت کے اندھیرے ہیں بےحساب جو ہیں نفرتوں کے اسباب وہ

جو تھے چاہتوں کے نگر کبھی اب بھولے بسرے ہیں خواب وہ.

ہیں سازشوں کے گھوڑے دوڑتے سرپٹ یہاں

ہیں ناخدا کے دلاسے بھی چھل کپٹ یہاں

یہاں بھیڑیے ہیں انسانوں کے بھیس میں

یہ قیامت ہے بپا جگنوؤں کے دیس میں