شعیب اختر نے وکیل کی وساطت سے پی سی بی کی طرف سے70لاکھ جرمانہ کے نوٹس کا جواب جمع کرادیا،معاملہ عدالت میں ہے،فیصلہ تک جرمانہ کی ادائیگی کو ٹیم میں شمولیت سے مشروط نہ کیاجائے،وکیل:
لاہور(اُردو پوائنٹ اخبار تازہ ترین۔14جولائی۔2008ء)مایہ ناز فاسٹ باؤلر شعیب اختر نے اپنے وکیلء عابد حسین منٹو کی وساطت سے پی سی بی کی طرف سے 70 لاکھ روپے جرمانے کی ادائیگی کے نوٹس کا پیر کے روز تحریری جواب دیدیا شعیب اختر کے وکیل عابد حسین منٹو نے پی سی بی کے چیئرمین ڈاکٹر نسیم اشرف کو شعیب اختر کی طرف سے دیے گئے تحریری جواب میں استدعا کی ہے کہ جرمانہ کی 14 جولائی تک ادائیگی کے اس نوٹس کو شعیب اختر کی چیمئنزٹرافی کرکٹ ٹورنامنٹ سمیت دیگر ٹورنامنٹ میں شمولیت سے مشروط نہ کیا جائے انہوں نے کہا کہ اپلیٹ ٹریبونل کی طرف سے شعیب اختر ڈیڑھ سال کی پابندی اور70 لاکھ روپے جرمانہ کی سزا کو ہائی کورٹ میں چیلنج کردیا گیا تھا اورلاہورہائی کورٹ نے اپنے عبوری حکم میں شعیب اختر کی کرکٹ پرپابندی کی سزا کومعطل کردیا تھا اورجرمانہ کومعطل نہ کیا تھا لیکن ہائی کورٹ نے جرمانہ کی ادائیگی کی تاریخ کا تعین نہیں کیا تھا جبکہ پی سی بی کے اپلیٹ ٹریبونل نے بھی شعیب اختر کے70 لاکھ روپے کے جرمانہ کی ادائیگی کی کوئی تاریخ مقرر نہیں کی تھی انہوں نے کہا کہ ہمارے موکل نے ہائی کورٹ میں بھی لکھ کردیا ہوا ہے کہ شعیب اختر پر عائد ہونے والے جرمانہ کی ادائیگی پر کورٹ نے فیصلہ دیدیا ہے تو وہ اسے ادا کرے گا اور ہائی کورٹ میں شعیب اختر کے کیس کی سماعت ستمبر میں ہوگی اور اسے جرمانہ کی ادائیگی کیلئے14 جولائی کی تاریخ دیدی گئی ہے اگر عدالت کا فیصلہ میرے موکل کے حق میں ہوگیا تو پی سی بی اس جرمانہ کو واپس کرے گا انہوں نے کہا کہ پی سی بی کی طرف سے 14 جولائی تک جرمانہ کی ادائیگی کے نوٹس کامقصد میرے موکل کوچمپئنزٹرافی کرکٹ ٹورنامنٹ میں سلیکشن سے روکنے کی ایک اورکوشش ہے کیونکہ جرمانہ کی ادائیگی کیلئے اتنا تھوڑا وقت دینا اسے سلیکشن کیلئے زیر غور نہ لانے کی واضح کوشش ہے انہوں نے کہا کہ نہ تو اپلیٹ ٹریبونل اور نہ ہی ہائی کورٹ کے فیصلہ میں ذکر ہے کہ اگر میرے موکل نے جرمانہ کی فوری ادائیگی نہ کی تو اسے کھیلنے سے روک دیاجائے انہوں نے کہا کہ اس نوٹس کے بھیجنے کا مقصد صرف اور صرف اسے چمپئنزٹرافی کرکٹ ٹورنامنٹ میں شرکت سے روکنا اورہائی کورٹ کی طرف سے شعیب اختر کو دیے گئے ریلیف میں رکاوٹ ڈالنا ہے۔