شعیب اختر کی اپیل کیلئے پی سی بی نیا اپلیٹ ٹربیونل نہیں بنائیگا ‘آفتاب فرخ:
لاہور (اُردو پوائنٹ اخبار تازہ ترین۔14جون۔2008ء)پی سی بی کے اپلیٹ ٹربیونل کے فیصلے کے بعد شعیب اختر کی اپیل کیلئے پاکستان کرکٹ بورڈ کوئی نیا اپلیٹ ٹربیونل نہیں بنائیگا ‘شعیب اختر کو فیصلے کے خلاف ہائیکورٹ اور پھر سپریم کورٹ سے ہی رجوع کرنا ہو گا۔ اپلیٹ بورڈ کے سربراہ جسٹس (ر)آفتاب فرخ نے خصوصی گفتگو کرتے ہوئے کہا کہ ہمارا اپلیٹ ٹربیونل پی سی بی کیطرف سے شعیب اختر کی اپیل کیلئے آخری ٹربیونل تھا شعیب اب ہمارے فیصلے کیخلاف صرف اور صرف ہائیکورٹ اور اسکے بعد سپریم کورٹ جا سکتا ہے ۔ انہوں نے کہاکہ شعیب اختر کو ڈیڑھ سال کی پابندی سے زیادہ بھی سزا دی جا سکتی تھی لیکن اسکے معافی مانگنے کی وجہ سے سزا کم کر دی گئی ہے ۔انہوں نے کہا کہ مجھ پر شعیب اختر کی سزا معاف کروانے کیلئے بڑی سے بڑی شخصیات نے دبا ؤ ڈالا لیکن میں نے کسی پر یشر کی پرواہ نہ کی اور میرٹ پر فیصلہ کیا ۔ انہوں نے کہا کہ شعیب اختر کی کونسلنگ کیلئے اچھے ماہر نفسیات کی ضرورت ہے بورڈ کو 60روز کے اندر اسکی کونسلنگ کروانی ہو گی ۔ انہوں نے کہا کہ شعیب اختر کی ڈیڑھ سال پابندی کی سزا ڈسپلنری کمیٹی کے فیصلے کی تاریخ سے شروع ہو گی ۔ انہوں نے کہا کہ شعیب اختر پر ڈسپلنری کمیٹی کی طرف سے 34لاکھ جرمانے کی سزا کم ہے ۔ اس سزا کا اس پر کوئی اثر نہیں پڑا تو اسے بڑھا کر ہم 70لاکھ روپے جرمانہ کر رہے ہیں اور ڈسپلنری کمیٹی کی پانچ سالہ پابندی کی سزا کو کم کر کے ڈیڑھ سال کر دی ہے ۔