عامر سپاٹ فکسنگ میں ملوث رہ چکے ہیں ‘ قومی ٹیم سے دور ہی رکھا جائے ‘انضمام الحق

اسلام آباد (اُردو پوائنٹ اخبارتازہ ترین - این این آئی۔26 نومبر۔2015ء)پاکستان کرکٹ ٹیم کے سابق کپتان اور مایہ ناز بلے باز انضمام الحق نے پاکستان کرکٹ بورڈ کو مشورہ دیا ہے کہ اسپاٹ فکسنگ میں ملوث رہ چکے محمد عامر کو قومی ٹیم سے دور رکھا جائے۔انضمام نے این ڈی ٹی وی کو انٹرویو دیتے ہوئے کہا کہ میرے خیال میں عامر یا اسپاٹ فکسنگ میں ملوث دیگر دو کھلاڑیوں کو پاکستانی ٹیم میں شامل کرنا درست نہیں ہوگاپاکستان کیلئے 120 ٹیسٹ اور 398 ون ڈے کھیل چکے انضمام نے کہا کہ مجھے محسوس ہوتا ہے کہ اگر عامر کو قومی ٹیم کے لیے دوبارہ منتخب کرلیا گیا تو اس سے کھلاڑیوں کا کھیل پر سے فوکس ہٹ جائے گا اور ان پر اور خود عامر پر اضافی دباوٴ آجائیگا۔

انہوں نے کہا کہ میں تجربے کی روشنی میں کہہ رہا ہوں کہ اگر عامر واپس آجاتے ہیں اور ٹیم انگلینڈ یا آسٹریلیا یہاں تک کہ ہندوستان کا بھی دورہ کرتی ہے تو پوری میڈیا کی توجہ کا مرکز صرف عامر ہی رہیں گے اور اس سے ڈریسنگ روم میں مسائل پیدا ہوں گے۔

(جاری ہے)

انضمام نے وضاحت کی کہ وہ ذاتی طور پر فاسٹ باوٴلر کے خلاف نہیں تاہم پی سی بی کو اس حوالے سے ایک پالیسی بناکر اس پر عمل پیرا رہنا ہوگا۔انہوں نے کہاکہ عامر کے لیے بھی ٹیم میں واپسی بہت مشکل ہوگی۔جب بھی کوئی میچ پاکستان ہارے گا یا جس میں عامر کی کارکردگی اچھی نہیں ہوگی۔ کراوٴڈ کی جانب سے عامر پر طعنے کسے جائیں گے اور اس سے ٹیم کی توجہ کرکٹ سے ہٹ جائے گی۔