ورلڈ کپ 1987ء جیتنے والی آسٹریلین ٹیم کا 30سالہ انتظار ختم ،میڈلز سے نواز دیا گیا

سڈنی (اُردو پوائنٹ اخبارتازہ ترین - آن لائن۔ 23 جنوری2017ء) 1987 کا ورلڈ کپ جیتنے والی آسٹریلین ٹیم کو بالا آخر 30 سال انتظار کے بعد ان کے ونر میڈل دے دیے گئے۔کولکتہ کے ایڈن گارڈنز میں 30 سال قبل دنیا کو حیران کرنے والی آسٹریلین ٹیم نے انگلینڈ کو شکست دے کر پہلی مرتبہ عالمی چیمپیئن بننے کا اعزاز حاصل کیا تھا۔عالمی چیمپیئنز کو اس وقت ٹرافی دی گئی تھی لیکن انفرادی سطح پر کھلاڑیوں کی عزت افزائی نہیں کی گئی تھی لیکن گزشتہ سال آئی سی سی نے اعلان کیا تھا کہ وہ ان ٹیموں کے کھلاڑیوں کو میڈل سے نوازے گی جنہیں ورلڈ کپ جیتنے پر میڈل نہیں دیے گئے تھے۔

30 سال بعد سڈنی کرکٹ گراؤنڈ میں ایلن بارڈر کی زیر قیادت تاریخ رقم کرنے والی اس ٹیم کے تمام 14 اراکین اور سپورٹ اسٹاف کو میڈل سے نوازا گیا۔

(جاری ہے)

پاکستان اور آسٹریلیا کے درمیان چوتھے ایک روزہ میچ میں اننگز کے وقفے کے دوران ایلن بارڈر، اسٹیو وا، کریگ میک ڈرمٹ اور ڈیوڈ بون سمیت بقیہ کھلاڑیوں میڈلز دیے گئے۔ایلن بارڈر نے اس میڈل پر شکریہ ادا کرتے ہوئے کہا کہ اس وقت ہمیں علم تھا کہ دیگر ٹیموں کو اچھی فائٹ دیں گے لیکن ہمارے وہم و گمان میں بھی نہیں تھا کہ ہم عالمی چیمپیئن بنیں گے۔

آسٹریلیا نے سیمی فائنل میں فیورٹ پاکستان اور پھر فائنل میں روایتی حریف انگلینڈ کو شکست دی اور ایونٹ میں آٹھ میں سے سات میچز جیتے تھے۔یاد رہے کہ یہ آسٹریلین ٹیم کیلئے کڑا وقت تھا اور وہ گریگ چیپل، روڈ مارش اور ڈینس للی جیسے کھلاڑیوں کے بعد بحالی کے عمل سے گزر رہی تھی اور ایلن بارڈر کی زیر قیادت اس نوجوان گروپ نے نئی تاریخ رقم کی اور ایک شاندار کیریئر کا ا آغاز کیا۔