کارڈف، لاس ویگاس (اردوپوائنٹ سپورٹس ڈیسک ) برندڈ باکسر ہوپکنز نے کامیابی سے آئی بی او لائٹ ہیوی ویٹ ٹائٹل کا دفاع کر لیا۔ انہوں نے لاس ویگاس میں ونکی رائٹ کو پوائنٹس پر ہرایا۔ ونکی رائٹ گزشتہ 7 سال سے ناقابل شکست چلے آ رہے تھے۔ سابق مڈل ویٹ چیمپئن ہوپکنز کو تینوں ریفریز نے فاتح قرار دیا۔ میچ کے دوران ونکی رائٹ نے زیادہ مکے رسید کئے لیکن مکے نشانے پر نہ لگنے کی وجہ سے وہ ہار گئے۔ ہوپکنز نے اعزاز کا دفاع کرتے ہوئے 21 ویں فائٹ جیتی۔ ادھر وینزویلا کے جارج لینارز نے میکسیکو کے آسکر کو 10 ویں راؤنڈ میں شکست دے کر ڈبلیو بی سی کا عارضی فیدر ویٹ ٹائٹل جیت لیا۔ یوں لینارز نے اب تک کے تمام 24 مقابلوں میں ناقابل شکست رہنے کا ریکارڈ بھی برقرار رکھا۔ ادھر ویلز کے انزو میکارن نے ڈبلیو بی او کروزر ویٹ ٹائٹل جیت لیا۔ انہوں نے وائن بریتھ ویٹ کو ہرایا۔ دونوں باکسرز کے درمیان میچ ابتداء میں ہی ناک آؤٹ پر ختم ہونے کا امکان تھا لیکن مقابلہ پانچویں راؤنڈ تک گیا۔ 28 سالہ انزو نے اب تک کی 28 میں سے 27 فائٹس ناک آؤٹ کے ذریعے جیت رکھی تھیں۔ ان کی حوصلہ افزائی کيلئے ویلز کے ورلڈ چیمپئن جوئے کالغازے فائٹ دیکھنے کيلئے موجود تھے۔ دریں اثناء ویلز کے گیون رینز نے پوائنٹس پر سولے مین ایم بائی کو ہرا کر ڈبلیو بی اے لائٹ والٹر ویٹ کا ٹائٹل جیت لیا۔ یوں 27 سالہ باکسر ناقابل شکست رہنے کا ریکارڈ برقرار رکھنے میں کامیاب رہے۔ ربز ویلز کی جانب سے عالمی مقابلہ جیتنے والے 10 ویں کھلاڑی ہیں۔ اس وقت کالغازے 2 ویٹ پر قبضہ کئے ہیں جبکہ انزو بھی چیمپئن ہیں۔ مزید برآں ایلکس آرتھر نے ورلڈ سپر فیدر ویٹ چیمپئن بننے کی ایک اور رکاوٹ دور کر دی۔ انہوں نے ڈبلیو بی او ٹائٹل پر بھی قبضہ کر لیا۔ سکاٹ لینڈ کے باکسر آرتھر نے فلاڈلفیا کے بوگوگولیزے کو 10 راؤنڈ کے مقابلے میں ہرا دیا۔