برن(اردوپوائنٹ سپورٹس ڈیسک10جون2008)یورو کپ فٹ بال ٹورنامنٹ میں ہالینڈ نے ورلڈ چیمپئن اٹلی کو تین صفر سے پچھاڑ دیا ، یہ ہالینڈ کی اٹلی کے خلاف تیس سال میں پہلی کامیابی ہے ، جبکہ فرانس اور رومانیہ کا میچ ایک ایک گول سے برابر رہا ، آج دفاعی چیمپئن یونان کی ٹیم اپنی مہم کا آغاز سوئیڈن کے خلاف میچ سے کررہی ہے ۔یورو کپ فٹ بال میں پیر کو گروپ سی کے میچز کھیلے گئے ، برن کے اسٹیڈ ڈی سوئس اسٹیڈیم میں کھیلے گئے میچ میں ہالینڈ نے ورلڈ چیمپئن اٹلی کو ناکوں چنے چبوادیے ، فاتح عالم ٹیم کی بے بسی کاعالم دیکھنے کے لیے اسٹیڈیم میں اکتیس ہزار سے زائد شائقین موجود تھے ، ڈچ پلیئر وین روڈ نیسلٹروئے نے26 ویں منٹ میں ٹیم کو برتری دلائی جسے پانچ منٹ بعد ہیSneijder نے دگنا کردیا ۔ ہالینڈ کے لیے تیسرا گول میچ کے خاتمے سے دس منٹ پہلےVan Bronckhorst نے اسکور کیا۔میچ کا اسکور مقابلے کی درست عکاسی نہیں کرتا ، تین صفر کی شکست کے باوجود اس میچ میں اٹلی کا کھیل برا نہیں تھا ،بس یہ اطالوی ٹیم کا دن نہیں تھا ، یورو کپ کے گروپ آف ڈیتھ کہلائے جانے والے گروپ سی کے پہلے میچ میں فرانس اور رومانیہ کامیچ بغیر کسی گول کے برابر رہا ، فرانس کو اگلے دو میچز میں اٹلی اور ہالینڈ کاسامنا کرنا ہے ، یوں اس کا پری کوارٹر فائنل مرحلے میں پہنچنا مشکل ہوگیا ہے۔یورو کپ میں آج گروپ ڈی کے میچز کھیلے جائیں گے ، اسپین کی ٹیم روس کا مقابلہ کرے گی جبکہ دفاعی چیمپئن یونان کی ٹیم سوئیڈن سے مقابلے کے ساتھ اپنی مہم کا آغاز کرے گی ۔