لاہور(اردوپوائنٹ سپورٹس ڈیسک28-مارچ2008 )پاکستان فٹبال ٹیم نے نیپال کو دوسرے دوستانہ میچ میں 2-0سے ہراکرسیریز برابرکردی۔نیپال کے ساحلی شہرپوکھرا میں کھیلے گئے دوسرے دوستانہ میچ پاکستان نے پہلے ہاف میں محمد قاسم کے گول کی بدولت برتری حاصل کرکے میچ پر اپنی گرفت مضبوط کرلی جو میچ دوسرے ہاف کے آغاز تک برقرار رہی دوسرے ہاف کے آغاز ہی سے مقابلے میں تیزی آگئی اس دوران دونوں ٹیموں کے فارورڈ اور سٹرائیکرز نے ایک دوسرے کے گول پوسٹ تابڑتوڑ حملے کیے تاہم کوئی بھی ٹیم گول نہ کرسکی پاکستان کی جانب سے ڈیفنڈرز نے ناقابل یقین کھیل کا مظاہرہ کرتے ہوئے حریف ٹیم کی تمام کوششیں ناکام بنا دیں پاکستان کی جانب سے دوسرا اور میچ کافیصلہ کن گول محمد رسول نے کیا،دو صفرکی برتری حاصل کرنے کے بعد پاکستانی ڈیفنڈرز ،گول کیپرز اور سٹرائیکرز نے عمدہ کھیل کا مظاہرہ کرتے ہوئے بال پر کنٹرول رکھا اور دفاعی حکمت علمی اپنا کر حریف ٹیم کے گول کرنے کے تمام منصوبے ناکام بنا کر نہ صرف میچ میں فتح حاصل کی بلکہ سیریز برابرکردی۔واضح رہے کہ اس سے قبل کھیلے گئے پہلے میچ میں پاکستانی ٹیم نے عمدہ کھیل کا مظاہرہ کیا تھا مگر کھیل کے آخری 13منٹ میں میزبان ٹیم نے یکے بعد دیگرے دوگول داغ کرمیچ اپنے نام کرلیا۔فتح کے بعد پاکستان فٹبال ٹیم کے ہیڈکوچ اختر محی الدین نے گفتگو کرتے ہوئے اپنی ٹیم کی پرفارمنس پر اطمینان کا اظہار کرتے ہوئے کہا کہ تمام کھلاڑیوں نے ان کی توقعات کے مطابق کھیل پیش کیا جس سے ان کے حوصلے بلند ہوگئے ہیں انہوں نے کہاکہ نیپال کے خلاف کھلاڑیوں نے اے ایف سی کپ کوالیفائنگ راؤنڈسے قبل عمدہ کھیل پیش کرکے یہ ثابت کردیا ہے کہ قومی ٹیم ایشیا کی بہترین ٹیموں میں سے ایک ہے۔قومی ٹیم فٹبال ٹیم نیپال کے خلاف دودوستانہ میچ کھیلنے کے بعد وطن واپس پہنچ کر اے ایف سی کپ کوالیفائنگ راؤنڈ کھیلنے کیلئے تائیوان روانہ ہوجائیگی۔