کراچی (اردوپوائنٹ سپورٹس ڈیسک09مئی 2008)قومی چیلنج کپ فٹ بال میں جمعرات کو سٹی گورنمنٹ فٹ بال اسٹیڈیم (کے ایم سی) میں حبیب بینک نے سندھ گورنمنٹ پریس کو 2-1 سے شکست دیکر کوارٹر فائنل میں اپنی پوزیشن مستحکم کرلی جبکہ پیپلزاسٹیڈیم میں کے پی ٹی کے خلاف ایک ایک گول سے ڈرا کھیلنے کے بعد پی آئی اے کی ٹیم مقابلے سے باہر ہوگئی۔ جمعے کو پیپلز اسٹیڈیم میں گروپ کا آخری میچ پاکستان اسٹیل اور پی ڈبلیو ڈی کے مابین کھیلا جائے گا۔ کوارٹر فائنل میں ہفتے کو پیپلزاسٹیڈیم میں نیوی اور حبیب بینک کی مضبوط ٹیمیں ایک دوسرے کے خلاف قسمت آزمائیں گی جبکہ سٹی گورنمنٹ اسٹیڈیم میں کے پی ٹی کا مقابلہ کے آر ایل کے ساتھ ہوگا دونوں میچز شام 4/ بجے کھیلے جائیں گے۔ جمعرات کو حبیب بینک نے سندھ گورنمنٹ پریس کو 2-1 سے مات دی پہلے ہاف کے 43/ ویں منٹ میں مڈفیلڈر محمد ابراہیم کے کارنر کے کراس پر اسٹرائیکر خیال محمد نے ہیڈ کے ذریعے گیند کو جال میں پھینکا پہلے ہاف میں ایک گول کی برتری کے بعد حبیب بینک کے کھلاڑیوں نے دوسرے ہاف میں بھی حریف پر دباؤ بڑھائے رکھا دوسرے ہاف میں کھیل کے 57/ ویں منٹ میں سندھ گورنمنٹ پریس کے مڈفیلڈر علی مراد نے 40/ گز کے فاصلے سے خوبصورت اور دلکش انداز میں گول کرکے اپنی ٹیم کو میچ میں و اپس لاکھڑا کیا تاہم 78/ ویں منٹ میں متبادل کے طور پر گراؤنڈ میں اترنے والے تجربے کار ایوب تاج حبیب بینک کے لیے فتح گربن گئے انہوں نے 83/ ویں منٹ میں اپنی ٹیم کے لیے فیصلہ کن گول بنا کر اسے کامیابی سے ہمکنار کردیا اور اس کی نشست کوارٹر فائنل میں کنفرم کردی اس کے چھ پوائنٹس ہوگئے۔ جمعرات کو کھیلے گئے پیپلزاسٹیڈیم کے میچ میں پی آئی اے کی ٹیم کے پی ٹی کے خلاف ایک ایک گول سے برابر کھیلنے کی صورت میں چار پوائنٹس کے بعد مقابلے سے باہر ہوگئی کے پی ٹی 8/ پوائنٹس کے ساتھ کوارٹر فائنل تک رسائی پانے میں کامیاب رہی اس میچ میں کھیل کے ساتویں منٹ میں اسٹرائیکر افضل کے گول نے پی آئی اے کو برتری دلادی جو 14/ ویں منٹ میں کے پی ٹی کے فرید مجید نے برابر کردی اور اپنی ٹیم کو ناکامی سے بچالیا دوسرے ہاف کا اختتام بغیر گول کے ہوا۔