لاہور(اردوپوائنٹ سپورٹس ڈیسک )اے ایف سی فیسٹیول آف فٹبال میں شرکت کیلئے قومی انڈر14فٹبال ٹیم لاہور سے تہران روانہ ہوگئی۔قومی ٹیم علامہ اقبال انٹرنیشنل ائیرپورٹ سے پی ایف ایف کی ڈپٹی ڈائریکٹر مسلم بٹ نے رخصت کیا ۔ایونٹ میں شرکت کرنیوالی 22رکنی قومی ٹیم کی قیادت کراچی سے تعلق رکھنے والے عبدالوحید کے سپرد کی گئی ہے۔ فیسٹیول آف فٹبال میں حصو لینے والی پاکستانی ٹیم میں دو گول کیپرز ،سات ڈیفنڈرز چھ مڈفیلڈرز اور سات سٹرائیکرز شامل ہیں ۔ایونٹ میں پاکستان سمیت میزان ایران کے علاوہ افغانستان ، بنگلہ دیش ،بھوٹان ، بھارت ، مالدیپ ، سری لنکا اور نیپال کی ٹیمیں شرکت کررہی ہیں۔ائیرپورٹ سے روانگی سے قبل میڈیا سے بات چیت کرتے ہوئے قومی فٹبال انڈر14ٹیم کے کوچ ناصر اسماعیل کا کہنا تھا کہ وہ ٹورنامنٹ جیتنے کیلئے پرامید ہیں اور تمام کھلاڑیوں نے بھرپورتیاری کررکھی ہے۔انہوں نے کہاکہ پورے ملک میں اوپن ٹرائلز کے بعد ایک بہترین ٹیم کا انتخاب کیا گیا ہے جوتوقعات پر پورا اترے گی انہوں نے کہاکہ کھلاڑیوں کو جدید طرز پر تربیت دی گئی ہے اور میراتھن کیمپ کے انقعاد سے ان کھلاڑیوں کو بہت کچھ سیکھنے کا موقع ملا۔ناصر اسماعیل نے مزید بتایا کہ تمام کھلاڑیوں میں بھرپور ٹیلنٹ موجود ہے اور ٹیم میں بہت سے ایسے باصلاحیت کھلاڑی ہیں جو مستقبل میں پاکستان کی نیشنل ٹیم کا حصہ ہونگے۔قومی ٹیم کے کپتان عبدالوحید نے کہاکہ وہ فتح کیلئے پرامید ہیں اور وہ جیت کیلئے جان لڑادینگے۔ایونٹ میں شرکت کرنیوالی قومی ٹیم ان کھلاڑیوں پر مشتمل ہے۔ عبدالوحید (کپتان)اسد عرفان (نائب کپتان)،احسن اللہ ، یاسر علی ، عضیر قادر،،محمد ساجد،حسن سلیم خان ، آصف وارث،شرم بابر ،حسین ارشد،محمد سلمان ،حبیب اللہ ،عامر ،بلال ارشد، احسن خان ،زونیل اسلم ،عمر یونس ،شیر محمد ، محمد نواز ، فضل محمود ،عرفان یونس اور احمد فہیم شامل ہیں۔