لندن (اردوپوائنٹ سپورٹس ڈیسک ) عالمی نمبر ون نے ٹینس کی دنیا پر اپنی حکمرانی برقرار رکھی اور ومبلڈن اوپن کے فائنل میں اپنے قدیمی حریف رافیل نڈال کو 5 سیٹ کے سخت مقابلے میں شکست دے کر مسلسل پانچویں بار ومبلڈن مینز سنگلز کا تاج اپنے سر پر سجا لیا۔ اس طرح انہوں نے سویڈن کے لیجنڈ بجورن بورگ کا مسلسل پانچ مرتبہ ومبلڈن ٹائٹل جیتنے کا ریکارڈ برابر کر دیا۔ روجر فیڈرر کے گرینڈ سلام ٹائٹل کی تعداد اب 11 ہو گئی جبکہ امریکہ کے سمپراس نے 14 گرینڈ سلام ٹائٹل جیت کر ریکارڈ بنا رکھا ہے۔ گزشتہ سال کے فائنل میں فیڈرر نے نڈال کو 4 سیٹ کے مقابلے میں شکست سے دوچار کیا تھا۔ لیجنڈ بجورن بورگ بھی میچ دیکھنے والوں میں شامل تھے۔ سپین کے بائیں ہاتھ کے نڈال کو کلے کورٹ کا بادشاہ تصور کیا جاتا ہے لیکن اس بار انہوں نے گراس کورٹ پر بھی شاندار کارکردگی کا مظاہرہ کیا۔ دوسرے اور چوتھے سیٹ میں کامیابی حاصل کر کے مقابلہ پانچویں سیٹ تک دھکیل دیا۔ روجر فیڈرر نے 7-6" 4-6" 7-6" 2-6" 6-2 سے کامیابی اپنے نام کی۔ ومبلڈن اوپن کے اپنے کیریئر میں فیڈرر نے دوسری بار 5 سیٹ کا میچ کھیلا۔ دونوں کھلاڑیوں کے درمیان مقابلہ 3 گھنٹے 45 منٹ جاری رہا۔ میچ پوائنٹ حاصل کرنے کے ساتھ ہی فیڈرر کورٹ پر لیٹ گئے۔ کورٹ تماشائیوں سے بھرا ہوا تھا اور کوئی بھی کرسی خالی نہیں تھی۔ سویڈن کے بجورن بورگ نے 1976"77"78"79"80 میں یہ ٹائٹل جیتا تھا۔ فیڈرر نے جیت کے بعد نڈال کو سخت حریف قرار دیا اور کہا کہ ان کو توقع نہیں تھی کہ مقابلہ اتنا طویل ہوگا۔