پیرس(سپورٹس ڈیسک) انٹر نیشنل ٹینس فیڈریشن کی عالمی رینکنگ میں خواتین کے سنگلز مقابلوں میں آسٹریلین اوپن کی فاتح کم کلسٹر نے ایک درجہ ترقی پاکر پہلی پوزیشن حاصل کر لی جبکہ مردوں میں رافیل ندال بدستور پہلے نمبر پر ہیں۔ ڈنمارک کی کیرولین وزنائیکی ایک درجہ تنزلی کے بعد پہلے سے دوسرے نمبر پر چلی گئی ہیں۔ راجر فیڈرر اور نوویک ڈجکووچ بالترتیب دوسرے اور تیسرے نمبر پر موجود ہیں سابق عالمی چیمپئن سرینا ولیمز بارہویں اور ماریا شیراپوا تیرہویں پوزیشن پر ہیں۔ انٹر نیشنل ٹینس فیڈریشن کی طرف سے جاری کردہ ٹینس کی تازہ ترین عالمی رینکنگ میں خواتین کے سنگل مقابلوں میں بیلجیئم کی کم کلسٹر ایک درجہ ترقی پاکر دوسرے سے پہلے نمبر پر پہنچ گئی ہیں۔ ڈنمارک کی کیرولین وزنائیکی ایک درجہ تنزلی کے بعد پہلے سے دوسرے نمبر پر چلی گئیں ۔ روس کی ویراذوناریوا تیسرے ، اٹلی کی فرانسیسکا شیون چوتھے، آسٹریلیا کی سمانتھا سٹوسر پانچویں، امریکہ کی وینس ولیمز چھٹے، چین کی لی نا ساتویں، سربیا کی جیلینا جانکووچ آٹھویں، بیلاروس کی وکٹوریہ آزارینکا نویں اور پولینڈ کی آگنیسکا راڈوانسکا دسویں نمبر پر بدستور قائم ہیں۔ امریکہ کی سرینا ولیمز 12ویں، روس کی ماریا شیراپوا13ویں، پیرس اوپن کی فاتح جمہوریہ چیک کی پیٹرا کویٹوا 4درجے ترقی پاکر 18ویں سے 14ویں نمبر پر پہنچ گئیں ہیں۔ روس کی سابق عالمی نمبر ایک دینارا سافنا کی تنزلی کا سلسلہ برقرار ہے اور وہ ٹاپ 100سے بھی نیچے چلی گئیں ہیں۔مردوں میں سپین کے رافیل ندال بدستور پہلے نمبر پر ہیں ۔ سوئیزر لینڈ کے راجر فیڈرر اور آسٹریلین اوپن کے فاتح سربین نوویک ڈجکووچ بالترتیب دوسرے اور تیسرے نمبر پر ہیں۔ اے بی این ایمرو ٹینس ایونٹ کے فاتح سویڈن کے رابن سوڈرلنگ کی رینکنگ میں بہتری نہیں آسکی اور وہ چوتھے نمبر پر قائم ہیں۔ برطانوی اینڈی مرے پانچویں نمبر پر سپین کے ڈیوڈ فیرر ایک درجہ ترقی پاکر ساتویں سے چھٹے جبکہ جمہوریہ چیک کے ٹامس برڈوچ ایک درجہ تنزلی کے بعد چھٹے سے ساتویں نمبر پر چلے گئے ہیں۔ امریکہ کے اینڈی راڈک آٹھویں ، سپین کے فرنینڈوورڈاسکو نویں اور روس کے میخائل یوزخنی دسویں نبر پر قائم ہیں۔ اے بی ایمرو کے رنر اپ فرانس کے جوویلفر ائیڈتسونگا 5درجے تنزلی کے بعد 13ویں سے 18ویں نمبر چلے گئے ہیں۔ آسٹریلوی ٹاپ سیڈ لیٹن ہیوٹ 16درجے تنزلی کے بعد 54ویں سے 70ویں نمبر پر چلے گئے ہیں۔