میلبورن (اُردوپوائنٹ سپورٹس ڈیسک17-جنوری2008)میلبورن میں جاری سال کے پہلے گرینڈ سلام ٹینس ٹورنامنٹ میں دفاعی چیمپئن امریکہ کی سرینا ولیمز، ٹاپ سیڈ بلجیم کی جسٹن ہینن، فرانس کی ایملی مورسیمو ، روس کی ماریہ شیراپووااور سربیا کی جیلینا جانکووچ اوربھارتی دوشیزہ ثانیہ مرزا کی کامیابیوں کا سفر جاری ہے،گزشتہ روز ویمنز ڈبل مقابلوں کے پہلے راؤنڈ میں ثانیہ مرزا اور آسٹریلیا کی ایلیکا مولک نے ایلینی ڈینی لیڈو جیسمپن وہر کو سخت مقابلے کے بعد 6-3، 4-6 اور 6-4 سے ہرا کر دوسرے راؤنڈ کیلئے کوالیفائی کیا۔ جبکہ سنگل مقابلوں میں سرینا ولیمز نے بہترین کھیل کا مظاہرہ کرتے ہوئے اپنی حریف چین کی کھلاڑی مینگ یون کو با آسانی چھ تین اور چھ ایک سے شکست دیدی، ٹاپ سیڈ کھلاڑی جسٹن ہینن نے بھی دوسرے راؤنڈ میچ میں اپنی حریف روس کی اولگا کو چھ ایک اور سات پانچ سے شکست دیکر تیسرے راؤنڈ میں جگہ بنا لی ہے، فرانس کی کھلاڑی ایملی مورسیمو نے گزشتہ روز روس کی کھلاڑی یاروسلوا کو چھ چار اور سات چھ سے شکست دیکر کامیابی حاصل کی، سربیا کی کھلاڑی جیلینا جانکووچ نے بھی اپنی حریف رومانیہ کی ایڈینا کو چھ دو اور سات پانچ سے شکست دیدی،روس کی ماریہ شرپووا نے سابق عالمی نمبرون امریکہ کی لنزے ڈیون پورٹ کو باآسانی چھ ایک اور چھ تین سے شکست دیکر تیسرے راؤنڈ تک رسائی حاصل کی۔ گزشتہ روز دوسرے راؤنڈ میں کامیابی حاصل کرنے والی کھلاڑیوں میں روس کی ایلینا ڈیمنٹیوا بھی شامل ہیں جنہوں نے سپین کی کھلاڑی انابیل میڈینا کو ایک سخت مقابلے کے بعد پانچ سات، چھ دو اور چھ تین سے شکست دی، جمہوریہ چیک کی کھلاڑی نکول وائی ڈیسووا نے آسڑیلیا کی ایلیشا مولک کو ایک یکطرفہ مقابلے کے بعد چھ دو اور چھ تین سے شکست دیکر ٹورنامنٹ سے آؤٹ کردیا، ادھر فرانس کی کھلاڑی اروانے رازائی نے اپنی ہم وطن کھلاڑی ٹاٹیانا گلوون کو ایک سخت مقابلے کے بعد چھ تین، تین چھ اور چھ تین سے شکست دیکر کامیابی حاصل کی، جاپان کی سوگی یاما نے بھی یوکرائن کی ٹاٹینا کو چھ چار اور چھ چار سے شکست دیدی، تیسرے راؤنڈ تک رسائی حاصل کرنے والی کھلاڑیوں میں فرانس کی ورجینیا رازنو بھی شامل ہیں جنہوں نے اٹلی کی فلاویا پینیٹا کو چھ دو، پانچ سات اور چھ تین سے شکست دی، روس کی الینا ونیسا نے امریکہ کی جل کرائے بس کو چھ دو اور چھ چار سے شکست دی، گزشتہ روز کھیلے جانے والے مردوں کے دوسرے راؤنڈ میں روس کے نکولے ڈیوی ڈنکو نے فرانس کے نیکولس ماوٹ کو چھ چار، چھ صفر اور چھ تین سے شکست دیکر تیسرے راؤنڈ میں جگہ بنا لی، روس کے ایگور نے بلجیم کے کرسٹوف ویلجن کو ساتھ پانچ، سات پانچ اور چھ دو سے شکست دی، سپین کے رافیل نڈال نے بھی فرانس کے فلورنٹ سیرا کو چھ صفر، چھ دو اور چھ دو سے شکست دیکر تیسرے راؤنڈ تک رسائی حاصل کی، امریکہ کے مارڈی فش نے سپین کے ٹومی روبریڈو کو چھ ایک، چھ دو اور چھ تین سے شکست دیدی۔