لاہور(اردوپوائنٹ سپورٹس ڈیسک)قومی کرکٹ ٹیم کے سٹاربیٹسمین محمد یوسف نے متنازع لیگ آئی سی ایل جوائن کرلی ہے۔79ٹیسٹ اور 269 ایک روزہ میچز میں پاکستان کی نمائندگی کرنے والے مڈل آرڈربلے باز کرکٹ بورڈ کو اطلاع کیے بغیر بھارت روانہ ہوگئے ہیں۔پاکستان کرکٹ بورڈ کے ڈائریکٹر آپریشنز ذاکرخان نے لاہور میں میڈیا سے بات چیت کرتے ہوئے اس بات کی تصدیق کی کہ محمد یوسف انڈین کرکٹ لیگ کھیلنے کی غرض سے بھارت چلے گئے ہیں جس کی تصدیق لاہور میں موجود ان کی بیوی نے کی۔ذاکر خان نے بتایاکہ یوسف ابوظہبی میں ہونیوالی سیریز میں قومی ٹیم کا حصہ ہیں لیکن اس کے باوجود وہ بغیر کچھ بتائے بھارت چلے گئے ہیں جوکہ ڈسپلن کی خلاف ورزی ہے اور اگر یوسف نے باقاعدہ انڈین کرکٹ لیگ جوائن کرلی تو ان کے خلاف بھی قانون کے مطابق کارروائی ہوگی اور ان پر پابندی عائد کردی جائیگی۔واضح رہے کہ محمد یوسف کو گزشتہ ڈیڑھ سال سے پاکستانی سلیکٹرز نظرانداز کرتے چلے آرہے ہیں اور انہیں پہلی بار ٹونٹی ٹونٹی ورلڈکپ میں شامل نہیں کیا گیا تھا جس پر یوسف نے آئی سی ایل سے معاہدہ کرلیا تھا لیکن پاکستان کرکٹ بورڈ کے سابق چیئرمین نسیم اشرف نے ٹیم کی وسیع تر مفاد میں یوسف کو بھاری رقم دیکر آئی سی ایل سے معاہدہ ختم کرنے پر راضی کیا اور یوسف کو آئی پی ایل میں شامل کرالیا لیکن یوسف کی آئی پی ایل میں شمولیت پر آئی سی ایل نے یوسف اور آئی پی ایل پر کیس کردیا جو کہ تاحال ممبئی کے سول کورٹ میں زیر سماعت ہے یہی وجہ ہے کہ یوسف آئی پی ایل کا پہلا ایڈیشن کھیلنے سے محروم رہے۔گزشتہ ماہ سلیکشن کمیٹی نے یوسف کو کینیڈا میں ہونیوالے ٹونٹی ٹونٹی کپ میں شامل نہیں کیا جس پر وہ کافی دلبرداشتہ تھے اورقومی ڈومیسٹک ٹورنامنٹ پینٹگولر کپ میں پنجاب کی نمائندگی نہیں کی لیکن اس کے باوجود سلیکٹرز نے انہیں ویسٹ انڈیز کے خلاف تین ون ڈے میچز کی سیریز میں شامل کرلیا لیکن قومی ٹیم کے اعلان کے چندگھنٹے بعد یہ انکشاف ہوا کہ یوسف آئی سی ایل کھیلنے کیلئے بھارت روانہ ہوگئے ہیں اور کرکٹ بورڈ نے بھی اس بات کی تصدیق کردی ہے۔