لاہور (سپورٹس رپورٹر) سابق ٹیسٹ کرکٹر اعجاز احمد کو قومی ٹیم کا فیلڈنگ کوچ بنانے کے تمام مراحل طے کر لئے گئے ہیں۔ وہ بھارت کے خلاف ہوم سیریز میں اپنی ذمہ داری سنبھالیں گے۔ ان کو حال ہی میں عبوری قومی سلیکشن کمیٹی کا رکن بنایا گیا تھا تاہم ذرائع کا کہنا ہے کہ انہوں نے ٹیم کا فیلڈنگ کوچ بننے کی خواہش کا اظہار کیا تھا جس کو پی سی بی نے منظور کر لیا۔ ابوظہبی سیریز کے بعد پی سی بی ان کے ساتھ دو سال کا معاہدہ کرے گی۔ انتخاب عالم کو اس سے پہلے دو سال کیلئے چیف کوچ بنایا گیا تھا اور عاقب جاوید کی ان کے نائب کے طور پر تقرری بھی کر دی گئی ہے۔ ذرائع کا کہنا ہے کہ انتخاب عالم نے اعجاز احمد کی تقرری پر کوئی اعتراض نہیں کیا ہے۔ ذرائع کا کہنا ہے کہ ابوظہبی سیریز کے بعد کوچنگ سٹاف کے ساتھ معاون سٹاف کی تقرری بھی کی جائے گی اور ان تمام ناموں کی منظوری پی سی بی گورننگ باڈی سے لی جائیگی جس کا اجلاس اس ماہ ہوگا ذرائع کا یہ بھی کہنا ہے کہ قومی ٹیم کیلئے بیٹنگ کوچ کی بھی تقرری کی جائے گی اور اس کیلئے شعیب محمد کے نام پر غور کیا جا رہا ہے۔ یاد رہے کہ ڈاکٹر نسیم اشرف کے دور میں ٹیسٹ کرکٹر ہارون رشید کے بھائی محتشم رشید قومی ٹیم کے فیلڈنگ کوچ تھے جن کو صرف فرسٹ کلاس کرکٹ کا تجربہ حاصل تھا۔ ان تقرریوں کے بعد قومی ٹیم کے لئے تمام ضروری سٹاف مکمل ہو جائے گا۔ قومی ٹیم کی پہلی ذمہ داری بھارت کے خلاف ٹیسٹ اور ون ڈے سیریز ہے جو اگلے سال جنوری میں شروع ہوگی۔