کراچی (اردوپوائنٹ سپورٹس رپورٹر) ویسٹ انڈیز کے خلاف قومی کر کٹ ٹیم کے دوروزہ تربیتی کیمپ کا آغاز کوچ انتخاب عالم کی سربراہی میں ہوا اسسٹنٹ کوچ عاقب جاوید اور منیجر یاور سعید بھی ان کی معاونت کر رہے ہیں جبکہ چیف سلیکٹر سلیم جعفر بھی موجود تھے ۔سہ پہر کو شروع ہونے والے کیمپ میں کھلاڑیوں نے فیلڈنگ اور بیٹنگ پریکٹس کی ۔دوران پریکٹس تمام کھلاڑیوں نے بیٹنگ اور بولنگ کی اوپننگ بیٹسمین ناصر جمشید کے بارے میں ڈاکٹر نے مکمل فٹ ہونے کی رپورٹ دے دی ہے ۔ کیمپ کے دوران قومی ٹیم کے کپتان شعیب ملک نے میڈیا سے بات چیت کرتے ہوئے کہا کہ انضمام الحق اور محمد یوسف کے ساتھ میرے تعلقات کبھی کشیدہ نہیں رہے ۔ یوسف نے بھارت جانے سے قبل ہمارے ساتھ پریکٹس کی پینٹینگولر کپ میں ان کی غیر حاضری کے متعلق مجھے پنجاب کے کوچ شاہد انور نے بتایا تھا کہ ان کی اہلیہ کی طبیعت صحیح نہیں جس کی وجہ سے وہ میچ نہیں کھیل رہے بعد میں معلوم ہوا کہ وہ آئی سی ایل کھیلنے بھارت چلے گئے ۔ میری محمد یوسف سے کبھی کوئی لڑائی نہیں ہوئی اور ہام رے درمیان بھائیوں جیسے تعلقات تھے مجھے نہیں معلوم کہ اگر انہوں نے میرے اوپر کس بنیاد پر الزامات لگائے ہیں ۔محمد یوسف کے جانے پیدا ہونے والے خلاء کو فواد عالم اور دوسرے بیٹسمینوں کی مدد سے پر کر لیں گے۔ شعیب ملک نے کہا کہ شعیب اختر میچ ونر بولر ہیں اور انہوں نے ہمیشہ اپنی ذمہ داری محسوس کر تے ہوئے جونیئرز کو بھی گائیڈ کیا اور ویسٹ انڈیز کے خلاف سیر یز میں ان کا کردار اہم ہوگا۔ انہوں نے کہا کہ انتخاب عالم کے ساتھ میں 1999ء میں بھی ٹیم کیساتھ رہا اور اب بھی ان کیساتھ کام کر نے میں کسی قسم کی کوئی مشکلات نہیں ہیں ۔ جیف لاسن کے بارے میں پوچھے گئے سوال کے جواب میں قومی کپتان نے کہا کہ ان کے ساتھ بیتا ہوا وقت اچھا رہا ۔