ابو ظبی (اردوپوائنٹ سپورٹس ڈیسک) پاکستان اور ویسٹ انڈیز کے درمیان تین ون ڈے انٹرنیشنل کی سیریز کی تقریب رونمائی پیر کوہوئی اس موقع پر ابو ظبی کرکٹ کلب کے چیف ایگزیکٹو دلاور مانی، پاکستان ٹیم کے کپتان شعیب ملک، ویسٹ انڈیز کے کرس گیل اور ورچون گروپ کے سید محمد علی بھی موجود تھے۔ اس موقع پر ابو ظبی کرکٹ کلب کے صدر دلاور مانی نے کہا میں دونوں ٹیموں کو خوش آمدید کہتا ہوں، ابو ظبی میں مقابلے سخت اور اچھی کرکٹ دیکھنے کو ملے گی اور یہاں کرکٹ کو فروغ ملے گا۔ سیریز کا پہلا میچ 12/ نومبر، دوسرا 14/ نومبر اور آخری میچ 16 نومبر کو ہو گا۔ اس موقع پر خیالات کا اظہار کرتے ہوئے پاکستان کرکٹ ٹیم کے کپتان شعیب ملک نے کہا ہے کہ ہم انشاء اللہ سیریز جیت کر واپس جائیں گے۔ محمد یوسف کے کھیلنے یا نہ کھیلنے سے ٹیم کو کوئی فرق نہیں پڑتا۔ اس پوزیشن پر جو بھی کھلاڑی کھیلے گا پوری ٹیم اسے سپورٹ کرے گی۔ کھلاڑی آتے جاتے رہتے ہیں۔ انہوں نے مزید کہا کہ سیرز میں دلچسپ اور بھرپور مقابلے ہوں گے، میں یہاں دو مرتبہ کھیل چکا ہوں، وکٹ بیٹسمینوں کیلئے مددگار ثات ہو گی، پہلے آٹھ سے دس اوورز اہمیت رکھتے ہیں، ہم پانچ فاسٹ بولر ضرور ساتھ لائے ہیں لیکن وکٹ اور حالات دیکھ کر ٹیم کا انتخاب کریں گے، جو بھی کھلاڑی سو فیصد پرفارمنس دے گا وہی ٹیم میں جگہ پائے گا۔ شعیب ملک نے کہا کہ اس سیریز سے ٹیم کو تجربہ حاصل ہو گا جو بھارت کیخلاف سیریز میں مددگار ثابت ہو گا۔ دوسری جانب ویسٹ انڈیز کے کپتان کرس گیل نے کہا کہ ہماری ٹیم نئے اور نوجوان کھلاڑیوں پر مشتمل ہے، بہت عرصہ بعد پاکستانی ٹیم ہمارے مدمقابل ہے جس کا ہم بھرپور مقابلہ کریں گے اور ہم پوری تیاری کے ساتھ ابو ظبی میں مثبت کرکٹ کھیلنے آئے ہیں۔ انہوں نے مزید کہا کہ ہماری ٹیم کیلئے تجربہ کار پاکستانی ٹیم چیلنج ہے، ہم اس چیلنج کا مقابلہ نوجوان اور پر عزم کھلاڑیوں کے ساتھ کریں گے۔ شعیب اختر ہماری ٹیم کیلئے کوئی مسئلہ نہیں ہے، ہمارے پاس بھی فاسٹ بولر موجود ہیں جو میچ جیتنے کی صلاحیت رکھتے ہیں۔ ابو ظبی کرکٹ اسٹیڈیم کی وکٹ کے بارے میں انہوں نے کہا کہ یہ اسپنرز کو مدد دے گی لیکن ہمارے فاسٹ بولر یہاں بھی اچھی کارکردگی دکھا کر سیریز جیتیں گے۔