لاہور (اردوپوائنٹ سپورٹس رپورٹر) وزیراعظم یوسف رضا گیلانی نے پاکستان کرکٹ بورڈ کے سربراہ کو یقین دلایا ہے کہ پاکستان، بھارت کرکٹ سیریز کے انعقاد کو ممکن بنانے کے لئے وہ بھارتی ہم منصب من موہن سنگھ سے بات کریں گے۔ بھارتی کرکٹ ٹیم کو پاکستان میں اعلیٰ سطحی سیکورٹی فراہم کی جائے گی تاکہ سیریز کا انعقاد ممکن ہو سکے۔ پاکستان کرکٹ بورڈ کے چیئرمین اعجاز بٹ نے جمعرات کو وزیراعظم ہاؤس میں سید یوسف رضا گیلانی سے ملاقات کی۔ ملاقات میں کرکٹ کے کئی معاملات پر بات چیت ہوئی۔ اعجاز بٹ نے ابوظبی میں قومی ٹیم کی کامیابی کے علاوہ اپنے مستقبل کے منصوبوں سے وزیراعظم کو آگاہ کیا لیکن ملاقات میں سرفہرست موضوع پاک بھارت سیریز تھی۔ بھارتی کرکٹ ٹیم نے13 جنوری سے19 فروری تک پاکستان کا دورہ کرنا ہے۔ دورے میں تین ٹیسٹ، پانچ ون ڈے انٹرنیشنل اور ایک ٹوئنٹی20 میچ کھیلا جائے گا۔ بھارتی کرکٹ کنٹرول بورڈ کو دورے کی کلیئرنس کے لئے حکومت کے جواب کا انتظار ہے۔ وزیراعظم یوسف رضا گیلانی نے اعجاز بٹ کو یقین دلایا کہ وہ سیریز کے انعقاد کو ممکن بنانے کے لئے وزیراعظم من موہن سنگھ سے بات کریں گے اور امید ظاہر کی کہ سیریز پروگرام کے تحت پاکستان میں ہوگی۔ پی سی بی کے ترجمان نے کہاکہ اعجاز بٹ، وزیراعظم پاکستان کے مشکور ہیں جنہوں نے اپنی مصروفیات میں سے وقت نکال کر کرکٹ کے معاملات بڑی توجہ سے سنے۔ وزیراعظم نے کہاکہ سیریز پروگرام کے مطابق ہوگی۔ پاکستان میں بھارتی ٹیم کو سیکورٹی فراہم کرنے کے لئے ہر ممکن اقدامات کئے جائیں گے۔ وزیراعظم نے کہاکہ کرکٹ ملک کا مقبول ترین کھیل ہے اس لئے پی سی بی کھیل اور کھلاڑیوں کو زیادہ سے زیادہ سہولتیں فراہم کرنے کے لئے ہر ممکن اقدامات کرے۔ پی سی بی کے ترجمان کے مطابق وزیراعظم نے کہاکہ کھیل کی سہولتوں میں اضافے کے لئے بھرپور اقدامات کئے جائیں اور ایسی پالیسی وضع کی جائے جس سے کھیل کو مزید فروغ ملے۔ بورڈ تمام معاملات کو پروفیشنل انداز میں چلائے۔ اعجاز بٹ نے وزیراعظم کو پی سی بی کے مجوزہ آئین کی تبدیلیوں کے اہم نکات سے آگاہ کیا۔ وزیراعظم نے کہا کہ آئین کے مطابق علاقائی ایسوسی ایشن کے انتخابات کرائے جائیں۔