لاہور(اردوپوائنٹ سپورٹس رپورٹر) سابق کپتان، قومی کوچ اور پی سی بی کے موجودہ ڈائریکٹر جنرل جاوید میانداد نے کہا ہے کہ پی سی بی پر آئی سی ایل کرکٹرز پر سے پابندی ختم کرنے کے لئے عوام اور میڈیا کا سخت دباؤ ہے۔ ان کا کہنا ہے کہ عمران نذیر، رانا نوید اور عمران فرحت جیسے کھلاڑیوں کو قومی ٹیم میں شامل کیا جائے اور ایک کرکٹر ہونے کے ناطے میری ذاتی رائے بھی یہی ہے کہ ان کو قومی ٹیم میں شامل کیا جائے۔ بھارتی بورڈ نے اس سلسلے میں جو رویہ اختیار کر رکھا ہے اس سے ان کرکٹرز کا بہت نقصان ہو رہا ہے۔ آئی سی ایل میں جانے والے بھارتی کرکٹرز پر بی سی سی آئی نے فوری طور پر ان کرکٹرز کو بین کر دیا جس کے بعد دوسرے ملکوں نے ان کی پیروی کرتے ہوئے اپنے کرکٹرز پر بھی ایسی ہی پابندی لگا دی اور یہ کھلاڑی قومی کے ساتھ ڈومیسٹک کرکٹ سے بھی محروم کر دیئے گئے۔ میانداد کا کہنا ہے کہ بھارتی بورڈ بہت پاور فل باڈی ہے وہ ان کو نچوانے کے حربے استعمال کر رہا ہے۔ جس سے کھلاڑی نقصان اٹھا رہے ہیں۔ بی سی سی آئی کا اب فرض بنتا ہے کہ وہ ان کھلاڑیوں کی طرف دوستی کا ہاتھ بڑھائیں۔ میانداد کا کہنا ہے کہ اگر آئی سی ایل کرکٹرز میں قومی ٹیم میں شمولیت کا ٹیلنٹ موجود ہے تو اس کو کس لئے ضائع کیا جا رہا ہے۔ میانداد نے یقین ظاہر کیا کہ بھارتی ٹیم پاکستان ضرور آئے گی۔ ایک بھارتی اخبار کو اپنے انٹرویو میں انہوں نے کہا کہ بھارتی ٹیم کے ٹور سے پاکستان میں چمپئنز ٹرافی کے انعقاد کا خواب پورا ہو جائیگا۔ اگر بھارتی ٹیم ہی پاکستان نہ آئے تو پھر ہم دوسری ٹیموں سے پاکستان آنے کی کیسے توقع کر سکتے ہیں تا ہم انہوں نے نیوٹرل مقام پر پاک بھارت سیریز کروانے کی مخالفت کی اور کہا کہ اگر پاکستان میں بھارتی ٹیم کیلئے سیکیورٹی خدشات موجود ہوں تو پھر یہ سیریز بھارت میں کروا دی جائے اور بھارتی بورڈ اس کی میزبانی کرے۔ اسے پاکستانی ٹیم کا بھارت کا ہوم ٹور بنا دیا جائے اور اس کے جواب میں بھارتی ٹیم بعد میں پاکستان کا ٹور کر سکتی ہے جب اسے اندازہ ہو جائے کہ پاکستان میں حالات اب اچھے ہو چکے ہیں