کراچی (اردوپوائنٹ سپورٹس ڈیسک05-اکتوبر2007) پاکستان اور ساؤتھ افریقہ کے درمیان پہلے ٹیسٹ کا کھیل دلچسپ مرحلے میں داخل ہوگیا۔ پاکستان کو میچ جیتنے کے لئے 278رنز اور ساؤتھ افریقہ کو 7وکٹیں درکار ہیں۔ چوتھے روز کھیل کے اختتام پر پاکستان نے 425رنز کا تعاقب کرتے ہوئے 3وکٹوں پر 146 رنز بنالئے۔ اس سے پہلے ساؤتھ افریقہ کی ٹیم نے اپنی دوسری اننگز 264 رنز بناکر ڈکلیئر کردی۔ جیک کیلس ٹیسٹ کی دوسری اننگز میں بھی سنچری بنانے میں کامیاب ہوگئے۔ انہوں نے 100 رنز بنائے جس میں 4چوکے اور ایک چھکا شامل تھا۔ ایشول پرنس نے 45، باؤچر نے 29 اور آندرے نیل نے 33رنز بنائے۔ ساؤتھ افریقہ کی 6وکٹیں 188 رنز پر گرگئیں لیکن ہینسل اور کیلس نے ساتویں وکٹ کی رفاقت میں 63رنز بناکر ٹیم کی پوزیشن مضبوط کردی۔ پہلی اننگز میں سنچری سکور کرنے والے جیک کیلس نے دوسری اننگز میں بھی پاکستانی کھلاڑیوں کی پیش نہ چلنے اور سنچری سکور کرڈالی۔ انہوں نے سنچری 201 گیندوں پر 4 چوکوں اور ایک چھکے کی مدد سے بنائی، وہ ناٹ آؤٹ رہے۔ ان کی سنچری مکمل ہوتے ہی جنوبی افریقن کپتان نے 264رنز 7 کھلاڑی آؤٹ پر اننگز ڈکلیئر کرکے پاکستان کو کامیابی کے لئے 424 رنز کا انتہائی مشکل ہدف دیا۔ پاکستان کی طرف سے دونوں فاسٹ باؤلرز بالکل ناکام رہے۔ عبدالرحمن جنہوں نے پہلی اننگز میں 4وکٹیں لی تھیں دوسری میں بھی 4وکٹیں لے اڑے۔ انہوں نے 105رنز دیئے۔ دنیش کنیریا نے 65 رنز کے عوض 3 وکٹیں لیں۔ عبدالرحمن نے کیریئر میں ایک میچ کی بہترین باؤلنگ کروائی۔ پاکستان نے 424 رنز کا تعاقب شروع کیا تو اس کے دونوں کھلاڑی 20رنز پر پویلین لوٹ گئے۔ محمد حفیظ نے ایک اور سلمان بٹ نے 3رنز سکور کئے۔ اس کے بعد یونس خان اور فیصل اقبال کے درمیان 114رنز کی پارٹنرشپ ہوئی۔ 134رنز کے مجموعی سکور پر فیصل اقبال 44 رنز بناکر آؤٹ ہوگئے۔ انہوں نے 8چوکے لگائے اور 69 گیندوں کا سامنا کیا۔ ڈیل سٹین نے 2 اور پال ہیرس نے ایک وکٹ حاصل کی۔ کھیل ختم ہوا تو یونس خان 93 رنز بناکر ناٹ آؤٹ تھے۔ انہوں نے تیزی سے رنز سکور کئے اور صرف 99گیندیں کھیلیں۔ انہوں نے 14چوکے اور ایک چھکا لگایا۔ پاکستان کی کامیابی کا دھندلا سا امکان موجود ہے