نئی دہلی (اردوپوائنٹ سپورٹس ڈیسک-31اکتوبر2007) دنیائے کرکٹ کے عظیم فاسٹ بولر اور پاکستان کے سابق کپتان وسیم اکرم نے ساؤتھ افریقہ کے خلاف پاکستانی ٹیم کی کارکردگی کے پیش نظر پاک بھارت سیریز میں بھارت کو فیورٹ قرار دے دیا۔ پاکستانی ٹیم5 ون ڈے اور تین ٹیسٹ کھیلنے کيلئے کل بھارت روانہ ہورہی ہے اور پہلا ون ڈي5 نومبر کو گوہاٹی میں کھیلا جائيگا۔ سابق کپتان لیجنڈ کرکٹر نے دبئی کے ایک اخبار سے گفتگو کرتے ہوئے کہا کہ ون ڈے سیریز میں دونوں ٹیموں کی طاقت یکساں نظر آرہی ہے لیکن ٹیسٹ سیریز میں بھارتی ٹیم پاکستان سے بہت آگے ہے۔انہوں نے کہا کہ انضمام الحق کی ریٹائرمنٹ کے بعد ٹیم کے مڈل آرڈر میں جو خلاء پیدا ہوا ہے وہ پر نہیں ہوسکتا۔ بھارتی ٹور میں وہ شدت سے یاد آئیں گے تاہم پاکستان کيلئے شعیب اختر کی واپسی نیک شگون ہے۔ انہوں نے پہلے ہی ون ڈے میں4 وکٹیں حاصل کرکے بھارتی ٹیم کيلئے خطرے کی گھنٹی بجا دی ہے۔ ٹیسٹ اور ون ڈے کرکٹ میں916 وکٹیں حاصل کرنے والے آل راؤنڈر کا کہنا ہے کہ شعیب اختر نے ابھی اپنا اصل ردھم اور سوئنگ حاصل نہیں کی اور بھارت میں وہ اسے حاصل کرلیں گے جہاں تک عرفان پٹھان کا تعلق ہے وہ بھارتی کنڈیشن میں بہت اچھی باؤلنگ کرتے ہیں ، ان کی باؤلنگ میں جو جھول آیا تھا وہ دور ہوگیا ہے۔ عرفان پٹھان باؤلنگ کے ساتھ ساتھ بیٹنگ میں بھی اچھی کارکردگی کا مظاہرہ کررہے ہیں۔ آسٹریلیا کيخلاف سیریز میں ہر دوسرا گیند لیگ بریک کی طرح کرایا لیکن ایسا صرف بھارتی پچوں پر ہوتا ہے، آسٹریلوی پچوں پر ان کو یقینا نقصان ہوگا، ان کو اپنی سوئنگ کو اور بہتر کرنا ہوگا۔ انہوں نے ایک بار پھر بھارتی بیٹنگ کو پاکستان کے مقابلے میں مضبوط قرار دیا۔