دہلی(اردوپوائنٹ سپورٹس ڈیسک02-نومبر 2007) پاکستان کرکٹ ٹیم نے اپنے دورہ بھارت کا آغاز دہلی الیون کے خلاف پریکٹس میچ میں 7وکٹوں سے کامیابی کے ساتھ کردیا ہے۔فیروزشاہ کوٹلہ کرکٹ سٹیڈیم دہلی میں کھیلے گئے میچ میں پاکستانی کپتان شعیب ملک نے ٹاس جیت کر پہلے فیلڈنگ کرنے کا فیصلہ کیا پاکستان کی جانب سے عمر گل اور شعیب اختر نے بولنگ کا آغاز کیا میچ کے دوسرے ہی اوور میں عمرگل نے ان فارم بلے باز گوتم گمبھیر کو واپس پویلین کی راہ دکھا دی۔دہلی الیون کی ٹیم مقرر ہ پچاس اوور میں 9وکٹوں کے نقصان پر 213رنز بنا سکی پاکستان کی جانب سے سب سے کامیاب بولر یونس خان رہے جنہوں نے 6اوور میں 26رنز کے عوض 2وکٹیں حاصل کیں جبکہ شعیب اختر ، عمرگل ، فواد عالم اور شاہد آفریدی نے ایک ایک کھلاڑی کو آؤٹ کیا۔جواب میں پاکستانی ٹیم نے جب ہدف کا تعاقب شروع کیا تو حسب روایات محض 13رنز پر ہی پاکستان کی پہلی وکٹ کامران کی صورت میں گری جنہوں نے 5رنز بنائے جبکہ ان کے ساتھی اوپنر عمران نذیر نے انتہائی جارحانہ بیٹنگ کی اور 22گیندوں پر چھ چوکوں کی مدد سے 34رنز بنانے کے بعد آؤٹ ہوئے ۔ناقص کارکردگی کی وجہ سے نائب کپتانی سے ہاتھ دھونے والے اوپنر بلے باز سلمان بٹ کو اس بار ون ڈاؤن کی پوزیشن پر آزمایا گیا جہاں وہ مکمل طور پر کامیاب رہے اور ایک طویل عرصے بعد 83رنز کی خوبصورت اننگز کھیل کر ریٹائرڈہرٹ ہوئے۔سلمان بٹ نے اپنی باری میں 84گیندوں کا سامنا کیا جس میں ایک چھکا اور ایک 13چوکے شامل تھے اس کے علاوہ مصباح الحق نے 39اور یاسر حمید نے 33رنز بنائے۔پاکستان نے مقررہ ہدف 42ویں اوور میں تین وکٹوں کے نقصان پر پورا کرکے سات وکٹوں سے کامیابی حاصل کی۔واضح رہے کہ پاکستان اور بھارت کے مابین پانچ ون ڈے میچز کی سیریز کا پہلا معرکہ 5نومبر کو گوہاٹی میں کھیلا جائیگا۔