کراچی (اردوپوائنٹ سپورٹس ڈیسک )پاکستان کے کوچ کی دوڑ آسٹریلیا کے سابق فاسٹ باؤلر جیف لاسن نے جیت لی۔ گزشتہ روز پی سی بی کی ایڈہاک کمیٹی نے اس کی منظوری دے دی اور وہ اگلے ماہ قومی ٹیم کے کوچ کا عہدہ سنبھال لیں گے۔ اس سے پہلے جیف لاسن پی سی بی کے ساتھ اپنے معاہدے پر دستخط کریں گے جن میں تنخواہ، رہائش اور دیگر مراعات کی تفصیلات طے کی جائيں گی۔ پاکستان کرکٹ بورڈ نے باب وولمر کی اچانک موت کے بعد واٹمور، جیف لاسن اور رچرڈڈن کا انٹرویو کیا تھا۔ ابتدا میں واٹمور فیورٹ تھے لیکن بعد میں قومی ٹیم کے کھلاڑیوں اور منیجر کی بھرپور سفارش پر ڈیوواٹمور اور رچرڈڈن کو ریس سے خارج کر دیا گیا۔ پی سی بی نے اس سلسلے میں جیف لاسن کو باقاعدہ اطلاع کر دی اور جیف لاسن نے بھی اس کی تصدیق کر دی ہے۔ جیف لاسن ان دنوں نیوساؤتھ ویلز ٹیم کے کوچ ہیں تاہم ان کو انٹرنیشنل کوچنگ کا تجربہ حاصل نہیں ہے۔ انہوں نے آسٹریلیا کی طرف سے 46ٹیسٹ میچوں میں 180 اور 79ون ڈے انٹرنیشنل میچز میں 88وکٹیں حاصل کر چکے ہیں۔ انہوں نے اپنا آخری ٹیسٹ 8دسمبر 1989ء میں سری لنکا کے خلاف برسبین میں کھیلا۔ لاسن کا کہنا ہے کہ اگر باب وولمر کی ہلاکت کے بارے میں صورتحال واضح نہ ہوتی تو وہ کبھی یہ ذمہ داری قبول نہ کرتے۔ مبصرین کا کہنا ہے کہ تجربہ کار واٹمور پر لاسن کو فوقیت دے کر پی سی بی نے ایک جوأ کھیلا ہے تاہم لاسن کا کہنا ہے کہ پاکستان کی ٹیم میں بہترین ٹیلنٹ موجود ہے، ان کو صحیح رویے کی ضرورت ہے جس کے تحت وہ مستقل مزاجی سے کھیلیں۔ گزشتہ 8برس میں 11مختلف کوچ پاکستانی ٹیم کے ساتھ کام کر چکے ہیں۔ ان کی تقرری 2سال کیلئے کی گئی ہے۔