گوالیار(اردوپوائنٹ سپورٹس ڈیسک16-نومبر2007)بھارت نے چوتھے ون ڈے میں پاکستان کو 6 وکٹوں سے شکست دے کر سیریز اپنے نام کرلی۔ پاکستان نے پہلے کھیلتے ہوئے 6 وکٹوں پر 255 رنز بنائے۔ بھارت نے 46.3 اوورز میں 4 وکٹیں کھو کر ہدف حاصل کرلیا۔ پاکستان کی طرف سے محمد یوسف ایک رنز کی کمی سے سنچری مکمل نہ کرسکے اور 99 رنز پر ناقابل شکست رہے۔ بھارت کی طرف سے ٹنڈولکر نے 97 رنز کی اننگز کھیلی۔ 4 وکٹیں 159 رنز پر گرنے کے بعد یووراج سنگھ اور مہندر دھونی نے 101 رنز کی ناقابل شکست رفاقت بنا کر ٹیم کو فتح دلا دی۔ پاکستانی باؤلرز متاثر کن باؤلنگ کا مظاہرہ نہ کرسکے۔ یووراج سنگھ 53 اور دھونی 45 رنز بناکر ناٹ آؤٹ رہے۔ سہواگ نے 43 اور گنگولی نے 5 رنز بنائے۔ شعیب اختر، عمر گل اور افتخار انجم نے ایک ایک وکٹ حاصل کی۔ اوپنرز کی کارکردگی سے مایوس کپتان شعیب ملک نے خود اوپن کی ذمہ داری سنبھالی لیکن یہ جوڑا بھی ٹیم کو اچھا سٹینڈ دینے میں ناکام ہوگیا۔ سلمان بٹ دوسری گیند پر آر پی سنگھ کا نشانہ بن گئے۔ اس طرح بغیر سکور کے پاکستان کی ایک وکٹ گر گئی۔ ان کی جگہ یونس خان کھیلنے آئے پہلے ہی اوور میں وکٹ گرنے پر دونوں کافی پریشر میں آچکے تھے۔ انہوں نے وکٹ بچاتے ہوئے محتاط انداز سے کھیلنا شروع کیا اور دونوں کے درمیان 19 اوورز میں 78 رنز کی رفاقت بنی۔ جب پاکستان کا سکور 78 رنز تھا توشعیب ملک کو ظہیر خان نے بولڈ کردیا۔ انہوں نے 31 رنز بنائے جس میں 3 چوکے شامل تھے۔ ان کی جگہ محمد یوسف کھیلنے کیلئے آئے یوسف اور یونس نے تیسری وکٹ کی رفاقت میں 51 رنز بنا کر ٹیم کو سہارا دیا۔ یونس خان 68 رنز بنانے کے بعد یووراج سنگھ کی گیند پر ان کے ہاتھوں کیچ ہوگئے۔ انہوں نے 104 گیندوں کا سامنا کیا۔ 5 چوکے اور ایک چھکا لگایا شاہد آفریدی صرف ایک رنز بنانے کے بعد گنگولی کی گیند پر ایل بی ڈبلیو ہوگئے۔ ان کی جگہ مصباح الحق کھیلنے کیلئے آئے۔ مصباح الحق نے ایک مرتبہ پھر اچھے کھیل کا مظاہرہ کیا اور محمد یوسف کا بھرپور ساتھ دیا دونوں کی شراکت میں 94 رنز بنے جس نے پاکستانی ٹیم کو حوصلہ دیا۔ مصباح الحق نے 39 گیندوں پر 2 چوکوں اور ایک چھکے کی مدد سے 40 رنز بنائے۔ سہیل تنویر 6 رنز بنا سکے۔ محمد یوسف کے 99 رنز میں 7 چوکے اور 2 چھکے شامل تھے۔ اس طرح پاکستان نے 6 وکٹوں پر 255 رنز بنائے۔ ظہیر خان نے دو، آر پی سنگھ، عرفان پٹھان، یووراج سنگھ اور گنگولی نے ایک ایک وکٹ حاصل کی۔ سچن ٹنڈولکر کو مین آف دی میچ قرار دیا گیا۔ پاکستانی کپتان شعیب ملک نے ٹاس جیت کر خود بیٹنگ کا فیصلہ کیا تھا، ٹیم میں عبدالرحمن کی جگہ فاسٹ باؤلر راؤ افتخار انجم کو شامل کیا گیا تھا۔
