گوالیار (اردوپوائنٹ سپورٹس ڈیسک16-نومبر2007) پاکستانی اسپیڈ اسٹار شعیب اختر نے کرکٹ سے ہٹ کر ایک بار پھر شہ سر خیوں میں جگہ بنالی ہے ۔ راولپنڈی ایکسپریس نے پونا کی جیل میں قید بولی وڈ اسٹار سنجے دت سے ملاقات کی خواہش ظاہر کی ہے ۔ اپنی اپنی فیلڈ کے سپر اسٹار اچھے دوست بتائے جاتے ہیں ، اور اس سے قبل مل بھی چکے ہیں ۔ شعیب اختر کے لئے پبلک ریلشننگ کا کام کرنے والی کمپنی کے بابی خان اس ملاقات کے لئے کوششیں کررہے ہیں تاکہ وہ پونا کی یوروادا جیل میں اپنے دوست سے مل سکیں ۔کمپنی کے گروپ منیجنگ ڈائریکٹر بابی خان کے مطابق شعیب اختر کا کہنا ہے کہ منا بھائی کے پرستاروں کی بہت بڑی تعداد ان کی رہائی کے لئے دعائیں کررہی ہے ۔ شعیب نے ایک دن قبل سنجے سے ملاقات کی خواہش ظاہر کی ہے ۔ شعیب اختر بھی سنجے کے بڑے پرستار ہیں ۔ جب سے سنجے جیل میں ہیں پاکستانی فاسٹ بولر وہ پہلی بڑی شخصیت ہیں جنہوں نے ان کی بہن پریا کے ذریعے ان سے ملنے کی خواہش ظاہر کی ہے ۔ بابی نے کہا کہ ہماری کمپنی نے پریا کو شعیب اختر کی خواہش کے بارے میں بتایا ہے تا کہ وہ ملاقات کا انتظام کرسکیں ۔ سنجے کی ضمانت کی درخواست پر فیصلہ20 نومبر کو ہوگا ۔ اگر ان کی ضمانت ہوگئی توجیل میں یہ ملاقات نہیں ہوسکے گی ۔ اس صورت میں دورے کے بعد شعیب اختر ، سنجے کی پالی ہل کی رہائش گاہ پر ملاقات کا ارادہ رکھتے ہیں ۔ شعیب اختر نے کہا کہ سنجے اچھے انسان ہیں ۔ پاکستان میں ان کے مداحوں کی بڑی تعداد ہے ۔ میں کئی خاندانوں کو جانتا ہوں جو سنجے کے لئے خصوصی دعائیں کررہے ہیں ۔ شعیب اختر نے کہا کہ میں نے سنجے کے لئے خاص تحفہ لیا ہے جو میں انہیں علیٰحدگی میں دوں گا ۔کسی کو اس بارے میں بتانا نہیں چاہتا ۔ شعیب اختر اور سنجے دت کو مہیش بھٹ کی فلم گینگسٹر میں کردار کی پیشکش ہوئی تھی جسے دونوں نے مسترد کردیا تھا ۔ تاہم شعیب اختر کا کہنا ہے کہ اب اگر انہیں کسی بھارتی فلم میں کام کرنے کی پیشکش ہوئی تو وہ قبول کرلیں گے۔ انہوں نے کہا میں زندگی میں زیادہ ذمے داریاں لینا چاہتا ہوں اور شادی کا فیصلہ کرلیا ہے ، تاہم ہونے والی بیوی پاکستانی ہوگی یا انڈین اس بارے میں کچھ نہیں کہا جا سکتا ۔