ہرارے (سپورٹس ڈیسک) پاکستان نے زمبابوے کو تیسرے ایک روزہ میچ میں 28 رنز سے شکست دیکر سیریز میں وائٹ واش کر دیا، اعزاز چیمہ کو شاندار باؤلنگ پر مین آف دی میچ جبکہ یونس خان کو مین آف دی سیریز قرار دیا گیا۔بدھ کو ہرارے سپورٹس کلب میں کھیلے گئے تین ایک روزہ میچوں کی سیریز کے آخری میچ میں زمبابوے نے ٹاس جیت کر پاکستان کو بیٹنگ کی دعوت دی، پاکستان نے مقررہ پچاس اوورز میں 270 رنز بنا کر زمبابوے کو جیتنے کیلئے 271 رنز کا ہدف دیا۔ پاکستان کی جانب سے یونس خان 81، اسد شفیق 51 رنز کے ساتھ نمایاں رہے جبکہ محمد حفیظ نے 23، عمران فرحت نے 37، شعیب ملک نے 14 رنز بنائے۔ مصباح الحق 29، عدنان اکمل 24 رنز بنا کر ناٹ آؤٹ رہے۔ زمبابوے کی طرف سے چمگبورا نے 2 جبکہ وٹوری، جاروس اور پرائس نے 1,1 وکٹ حاصل کی۔ زمبابوے کی ٹیم کو دونوں اوپنرز سباندا اور چبھابھا نے 110 رنز کی مضبوط بنیاد فراہم کی، تاہم دونوں اوپنرز کی ففٹیز رائیگاں گئیں اور میزبان ٹیم مقررہ ہدف حاصل کرنے میں ناکام رہی، 110 کے مجموعے پر سباندا کی وکٹ گرنے کے بعد 120 پر نئے آنیوالے ٹیلر بھی وکٹ گنوا بیٹھے جس کے بعد وقفے وقفے سے وکٹیں گرتی رہیں اور پاکستانی باؤلرز نے میزبان ٹیم کو کھیل پر حاوی ہونے کی اجازت نہ دی۔ چبھابھا 62 رنز بنا کر آؤٹ ہوئے تو ان کے بعد کوئی بلے باز نمایاں کارکردگی کا مظاہرہ نہ کرسکا اور مقررہ پچاس اوورز میں زمبابوین ٹیم 9 وکٹوں کے نقصان پر 242 رنز بنا سکی اس طرح پاکستان نے سیریز کا تیسرا میچ 28 رنز سے جیت کر میزبان ٹیم کیخلاف وائٹ واش کردیا، پاکستان کی جانب سے اعزاز چیمہ نے 4، یاسر شاہ نے 2، سہیل خان اور شعیب ملک نے 1,1 وکٹ حاصل کی۔ اعزاز چیمہ کو شاندار باؤلنگ کرانے پر مین آف دی میچ قرار دیا گیا، یونس خان کو سیریز میں عمدہ کارکردگی پر مین آف دی سیریز کا اعزاز ملا۔ پاکستان نے تیسرے میچ میں نئے باؤلر یاسر شاہ کو موقع دیا جو دو وکٹیں حاصل کرنے میں کامیاب رہے۔