لاہور (اردوپوائنٹ سپورٹس ڈیسک ) سپیڈ سٹار شعیب اختر نے جیف لاسن کی بطور کوچ تقرری کا زبردست خیرمقدم کرتے ہوئے دعویٰ کیا ہے کہ صرف ایک آسٹریلوی کوچ ہی پاکستان کو ایسی ٹیم میں ڈھال سکتا ہے جو دنیا کی بہترین ٹیموں کو شکست دے سکے۔ میں ان کے پاکستان آنے کا مشتاق ہوں۔ وہ ہمیں اٹھا کر اس لیول پر لے جا سکتے ہیں کہ ہماری ٹیم ورلڈ فاتح بن سکے۔ میں نے ہمیشہ آسٹریلوی سوچ سے محبت کی ہے۔ وہ ہمیشہ جیت کے لیے میدان میں اترتے ہیں۔ لیکن اگر وہ ہار بھی جائیں تو آخری گیند تک جدوجہد جاری رکھتے ہیں۔ مجھے اعتماد ہے کہ لاسن آسٹریلیا کو ہرانے میں ہمارے مددگار ثابت ہوں گے۔ کیونکہ وہ آسٹریلوی ٹیم کی کمزوریوں اور ان کے مضبوط پوائنٹ سے واقفیت رکھتے ہیں۔ انہوں نے کہا کہ برصغیر کی ٹیموں خاص طور پر سری لنکا اور بنگلہ دیش کو آسٹریلوی کوچ ڈیو واٹمور سے بہت فائدہ ہوا۔ آسٹریلوی کوچز کی سوچ برصغیر کے لوگوں سے مختلف ہے۔ وہ معمولی چیزوں کے بارے میں بھی علم رکھتے ہیں اور اس پر کام کرتے ہیں جبکہ برصغیر کے لوگ کسی اور طرح سوچتے ہیں۔ شعیب اختر نے کہا کہ پاکستان کے پاس فاسٹ باؤلرز کی لائن اپ بہت مضبوط ہے اور لاسن اس نظریے کے قائل ہیں کہ فاسٹ باؤلرز ٹیم کو میچ جتوا سکتے ہیں اور مجھے یقین ہے کہ ان کی کوچنگ میں میری اپنی پرفارمنس بھی بہتر ہو گی۔ شعیب اختر نے انکشاف کیا کہ نیو ساؤتھ ویلز میں سٹیووا اور مارک ٹیلر نے بھی ان سے مدد لی۔ میں بڑی شدت سے آسٹریلوی ٹیم کے ٹور کا انتظار کر رہا ہوں اور میری خواہش ہے کہ پاکستانی ٹیم میری موجودگی میں کم از کم ایک سیریز آسٹریلیا سے جیتے۔