ڈربن (اردوپوائنٹ سپورٹس ڈیسک 26 نومبر2007)جنوبی افریقا نے پہلے ون ڈے انٹرنیشنل میں سنسنی خیز اور دلچسپ مقابلے کے بعد نیوزی لینڈ کو دو وکٹ سے ہرادیا۔ میچ کا فیصلہ پچاسویں اوور کی آخری گیند پر ہوا۔ٹیل اینڈر آندرے نیل نے غیر متوقع طور پر کیوی فاسٹ بولر مارک گلیسپی کو دو متواتر باؤنڈریز رسید کرکے ناممکن کو ممکن کردکھایا۔ نیوزی لینڈ کی جانب سے کیل ملز نے شاندار بولنگ کرتے ہوئے پانچ کھلاڑیوں کو آؤٹ کیا۔ کیویز نے پہلے کھیلتے ہوئے مقررہ اوورز میں چھ وکٹ کے نقصان پر 248 رنز بنائے، ون ڈاؤن بیٹسمین جیمی ہاؤ نے بہترین بیٹنگ کا مظاہرہ کرتے ہوئے 90 رنز اسکور کیے، اوپنر برینڈن میک کولم اور اسکاٹ اسٹائرس نے 40،40 کی اننگز کھیل کر ان کا اچھا ساتھ دیا ۔ میتھیو سنکلیئر نے جارحانہ انداز اختیار کرتے ہوئے 32 رنز کی کارآمد اننگز کھیلی۔جنوبی افریقاکی جانب سے ایک بار پھر شان پولاک نے نپی تلی بولنگ کا مظاہرہ کیا اور 10 اوورز میں صرف 21 رنز دیے ۔آندرے نیل بولنگ میں بھی نمایاں رہے ، انہوں نے تین کھلاڑیوں کو آؤٹ کیا۔ ہوم سائیڈ کی بیٹنگ کا آغاز تباہ کن تھا، اسے پہلے ہی اوور میں اوپنر وین وائک کی وکٹ کا نقصان اٹھانا پڑا، جبکہ 9 کے ٹوٹل پر جیک کیلس بھی پویلین لوٹ گئے ۔ ابراہم ڈیویلیئرز اور کپتان اسمتھ اسکور 100 تک لے گئے، اس ٹوٹل پر اسمتھ 44 رنز بنا کر آؤٹ ہوگئے ، تاہم ڈیویلیئرز نے پیشقدمی جاری رکھی، 172 پر کپتان ڈینیل ویٹوری ڈیویلیئرز کی اہم وکٹ حاصل کرکے کیویز کو میچ میں واپس لے آئے ، وہ 87 رنز بناکر آؤٹ ہوئے ۔ جے پی ڈومینی نے 46 رنز اسکور کیے ، اس کے بعد ملزنے پولاک، بوتھا اور مورکل کو آؤٹ کرکے میچ کا پانسہ کافی حد تک نیوزی لینڈ کے حق میں پلٹ دیا، لیکن باؤچر اور نیل نے ان کی کاوشیں ناکام بناتے ہوئے کامیابی اپنے نام کرلی ۔ باؤچر 35 اور نیل 10 رنز بنا کر ناٹ آؤٹ رہے ۔