نئی دہلی (اردوپوائنٹ سپورٹس ڈیسک07-دسمبر2007) پاکستان کرکٹ ٹیم کے سابق کپتان اور کمنٹیٹر رمیزراجہ نے کہا ہے کہ مصباح الحق قومی کرکٹ ٹیم کی کپتانی کیلئے بہترین چوائس ہیں۔ اپنے ایک انٹرویو میں رمیز راجہ نے کہاکہ مصباح الحق ایک بہترین کھلاڑی ہیں جنہوں نے مستقل اچھی کارکردگی کامظاہرہ کرکے اپنی صلاحیتوں کا لوہا منوایا ہے ۔ انہوں نے کہاکہ شعیب ملک کے علاوہ اگر کوئی کھلاڑی ٹیم کی قیادت کیلئے موزوں ہے تو وہ صرف اور صرف مصباح الحق ہے۔ رمیز راجہ نے کہاکہ ان کی فارم تعلیم انھیں دوسروں سے ممتاز کرتی ہے ۔ انہوں نے کہاکہ مصباح الحق نے پاکستان کی بیٹنگ لائن کے مسائل کافی حد تک ختم کردئیے ہیں یہی وجہ ہے کہ اگر بورڈ شعیب ملک کے متبادل پر غور کررہا ہے تو پھر مصباح الحق سے بہتر کوئی اورنہیں ہے ۔ انہوں نے کہاکہ یونس خان پہلے ہی ٹیم کی قیادت سے معذوری ظاہر کرچکے ہیں ان حالات میں مصباح الحق ہی بہترین چوائس ہیں۔ رمیزراجہ نے کہاکہ مصباح الحق مکمل طورپر فٹ ہونے کے ساتھ ساتھ مستقل اچھی پرفارمنس کامظاہرہ کررہے ہیں۔ رمیز راجہ نے ہیں آفريدی کوٹیسٹ سکواڈ سے ڈراپ کیے جانے کے فیصلے پر بھی حیرانگی کااظہار کرتے ہوئے کہاکہ انھیں ہرحال میں ٹیسٹ سکواڈ کاحصہ ہوناچاہیے کیونکہ ان کے باعث فیلڈ کے اندر اور باہر ہر کوئی پرجوش رہتا ہے۔ ایک اور سوال کے جواب میں رمیزراجہ نے کہاکہ پاکستان کرکٹ ٹیم بھارت کے خلاف ٹیسٹ جیت کر سیریز برابر کرنے کی بھرپور صلاحیت رکھتی ہے ۔ رمیزراجہ نے کہاکہ دوسرے کرکٹ ٹیسٹ میں جس طرح قومی کرکٹ ٹیم نے شدید بھارتی دباؤ کاڈٹ کا مقابلہ کیا اس سے کھلاڑیوں کے حوصلے بلند ہوئے ہیں اورقومی کرکٹ ٹیم تیسرے ٹیسٹ میں جارحانہ کھیل پیش کرتے ہوئے فتح حاصل کرکے سیریز برابر کرسکتی ہے۔