لاہور(اردوپوائنٹ سپورٹس ڈیسک21 اگست 2008)بیجنگ اولمپکس گیمز میں برطانیہ نے اپنے ماضی اور موجودہ اولمپکس کھیل میں گولڈ میڈل کی ڈبل سنچری مکمل کرلی۔ برطانیہ نے یہ سنچری مردوں اور خواتین اسپرنٹ، سائیکلنگ ایونٹ میں گولڈ میڈلز جیت کر مکمل کی۔ تمغوں کی دوڑ میں چین بدستور اپنی حکمرانی قائم رکھے ہوئے ہے۔ اس نے42 گولڈ 14 سلور اور 18 برانز میڈلز کے ساتھ اپنے تمغوں کی مجموعی تعداد 74 کرلی ہے۔ امریکا دوسرے اور برطانیہ تیسرے نمبر پر ہے۔ منگل کو 12 ویں روز مردوں کے ہائی جمپ میں روس کے آندرے سل توف نے گولڈ میڈل حاصل کیا۔ برطانیہ کے کرس ہوئے نے سائیکلنگ میں گولڈ میڈل جیت لیا۔ خواتین کے جمناسٹک اسپرنٹ ایونٹ میں برطانیہ کی وکٹوریہ پین ڈولٹن نے گولڈ میڈل جیت لیا۔ خواتین کی جمناسٹک کے ٹیم ایونٹ میں امریکا کی شان جانسن نے گولڈ میڈل حاصل کرلیا۔ مردوں کے پیرالل میں چین کے ژو پینگ لی نے جب کہ ہوری زینٹل ایونٹ میں کی ژو نے طلائی تمغہ حاصل کرلیا۔ مردوں کے ٹرمپولن میں چین کے چون لونگ نے گولڈ میڈل حاصل کرلیا۔ سیلنگ میں لیزر کلاس میں برطانیہ کے حان فورڈینو نے طلائی تمغہ حاصل کیا۔ ویٹ لفٹنگ میں105 کلوگرام پلس میں جرمنی کے میتھائس اسٹینر نے گولڈ میڈل جیت کر ریکارڈ قائم کیا۔ 55 کلوگرام فری اسٹائل ریسلنگ میں امریکا کے ہینری سی ڈو گولڈ میڈل جیتنے میں کامیاب رہے۔ مردوں کے ہاکی مقابلے میں آسٹریلیا اور برطانیہ کا میچ 3-3 گول سے برابر رہا۔ وقفے پر برطانیہ کو ایک گول کی برتری حاصل تھی۔ اسپین نے کوریا کو 2-1 سے مات دی۔ کینیڈا نے جنوبی افریقا کو 5-3 سے ہرایا۔ چین کی خواتین ہاکی ٹیم سیمی فائنل میں بدھ کو جرمنی سے مقابلہ کرے گی جب کہ ارجنٹائن اور ہالینڈ کے درمیان مقابلہ ہوگا۔ مردوں کے فٹ بال سیمی فائنل میں نائجریا نے بلجیم کو 4-1 سے ہرا دیا اور فائنل میں جگہ حاصل کرلی۔