لاہور(اردوپوائنٹ سپورٹس ڈیسک)پاکستان اولمپکس ایسوسی ایشن نے بیجنگ اولمپکس 2008کیلئے 35رکنی قومی دستے کا اعلان کردیاہے جن میں 21کھلاڑی اور 14 آفیشلز شامل ہیں۔گزشہ روزلاہور میں پاکستان اولمپکس ایسوسی ایشن کی ایگزیکٹو کمیٹی کے اجلاس کے بعد پریس کانفرنس کرتے ہوئے پی اے او کے صدر لیفٹیننٹ جنرل (ر) عارف حسن نے بتایاکہ اولمپکس میں پاکستان کی جانب سے 16رکنی ہاکی ٹیم جبکہ اس کے ساتھ پانچ آفیشلزشرکت کرینگے جبکہ سوئمنگ میں ایک مرد اور ایک خاتون تیرا ک کرن خان کے ہمراہ ایک آفیشل اولمپکس میں پاکستان کی نمائندگی کریگا۔اتھلیٹکس میں ایک مرد اور ایک خاتون اتھلیٹ کے ہمراہ ایک آفیشل کا اعلان کیا گیا ہے جبکہ شوٹنگ میں ایک کھلاڑی اور ایک آفیشل اولمپکس گیمز میں شرکت کرینگے۔ایگزیکٹوکمیٹی کے اجلاس میں پی او اے نے ہاکی ٹیم کی کارکردگی اور تیاریوں کے بارے میں آگاہی حاصل کرنے کیلئے پاکستان ہاکی فیڈریشن کے سیکرٹری جنرل خالدمحمود کو خصوصی طور پر مدعوکیا جنہوں نے اجلاس میں ہاکی ٹیم کی تیاریوں کے بارے میں کمیٹی کوبریفنگ دی۔اس موقع پر میڈیا سے بات چیت کرتے ہوئے عارف حسن نے کہاکہ آج کی میٹنگ میں پاکستان میں کھیلوں کے انفراسٹرکچر پر خصوصی بات چیت ہوئی اور بہتری کیلئے تجاویز پیش کی گئی۔عارف حسن نے بتایا کہ اولمپکس مشعل کی پاکستان میں آمد اوربہترین انتظامات کرنے پر چینی حکومت نے چین کی عوام کی طرف سے پاکستانی حکومت اور پوری قوم کو مبارکباد پیش کی اور اپنے پیغام میں کہا کہ اولمپک مشعل کے شاندار استقبال سے پاک چین دوستی کا رشتہ مزید گہرا اور مضبوط ہوگا۔چیئرمین پی او اے نے بتایا کہ ہاکی ٹیم کا اعلان پی ایچ ایف کریگی اور اگلے ایک دو روز تک اولمپک میں شرکت کرنے والے شوٹر اور اتھیلٹ کے ناموں کا اعلان کردیا جائیگا۔انہوں نے مزید بات چیت کرتے ہوئے کہاکہ پاکستان اولمپک ایسوسی ایشن ملک میں کھیلوں کی بہتری کیلئے ہنگامی بنیادوں پر کام کررہی ہے ۔ایک سوال کے جواب میں انہوں نے کہاکہ کچھ ایسوسی ایشنز کے درمیان اختلافات ہیں جنہیں دور کرنے کی کوشش کی جارہی ہے تاکہ تمام لوگ ملکر کھیلوں کی ترقی کیلئے اپنا کردار ادا کرسکیں۔اس کے علاوہ پی او اے نے اکتوبر میں ہونیوالے کامن ویلتھ گیمز کیلئے بھی پاکستان دستے کا اعلان کردیا جہاں21رکنی پاکستانی دستہ پاکستان باکسنگ ،سوئمنگ، ویٹ لیفٹنگ اور ریسلنگ کے ایونٹس میں شرکت کریگا ۔