لاہور(اردوپوائنٹ سپورٹس ڈیسک01مئی 2008) شعیب اختر کا انڈین پریمیئر لیگ میں شرکت کا معاملہ پیچیدہ ہوتاجارہا ہے، پاکستان کرکٹ بورڈ کوشاں ہے کہ انہیں آئی پی ایل کھیلنے کا موقع مل جائے ۔ پی سی بی کے وکیل تفضل رضوی نے بتایا کہ میں نے چیئر مین ڈاکٹر نسیم اشرف کی جانب سے للیت مودی اور شرد پوار سے بات کی ہے کہ شعیب کو لیگ میں شرکت کی اجازت دے دی جائے تو ہمیں اس پر کوئی اعتراض نہیں، جبکہ بھارتی کرکٹ بورڈ کے ذرائع کا کہنا ہے کہ انہیں اس بات کی اجازت نہیں ملے گی، ذرائع کے مطابق بنگلور میں اسپیشل جنرل باڈی اجلاس میں فیصلہ کیا گیا کہ شعیب کو اس وقت تک کولکتہ نائٹ رائیڈرز کا حصہ نہیں بنایا جاسکتا جب تک انہیں انٹرنیشنل کرکٹ میں پاکستان کی نمائندگی کی اجازت نہیں دی جاتی۔ اس بارے میں رسمی اعلان لیگ کے روح رواں للیت مودی جمعرات کو کریں گے۔ راولپنڈی ایکسپریس کی خدمات شاہ رخ خان نے4 لاکھ 25 ہزار ڈالر میں حاصل کی ہیں۔ تفضل رضوی نے بدھ کوانکشاف کیا کہ پی سی بی نے اپیلیٹ ٹریبونل کا تفصیلی فیصلہ منتظمین کو بھجوادیا ہے، ڈاکٹر نسیم اشرف نے وسعت قلبی کا مظاہرہ کرتے ہوئے للیت مودی کو فون کرکے درخواست کی شعیب کو آئی پی ایل میں حصہ لینے کی اجازت دے دی جائے، انہوں نے شرد پوار اور مودی کو اس ضمن میں ای میل بھی کی ہے۔ اگر کیس کے حوالے سے انڈین پریمیئر لیگ کو مزید دستاویزات درکار ہیں تو ہم انہیں فراہم کردیں گے۔ تفضل رضوی نے مزید کہا کہ چیئرمین پی سی بی نے بڑے پن کا مظاہرہ کرتے ہوئے موقف اختیار کیا ہے کہ شعیب پاکستانی ہے اگر ہم اس کی مدد کرسکتے ہیں تو ضرورکریں گے۔ انہوں نے کہا کہ عبوری فیصلہ آنے کے سبب شعیب کا کیس ختم ہوگیا تھا کیونکہ جسٹس آفتاب نے ان کی حکم امتناع کی درخواست مسترد کردی تھی، البتہ ڈاکٹر نسیم اشرف کے ہتک عزت کے دعوے کا جائزہ بعد میں لیا جائے گا۔