لاہور(اردوپوائنٹ سپورٹس ڈیسک15مئی 2008)کول کتہ نائٹ رائیڈرز کی نمائندگی کرنے والے پاکستانی فاسٹ بولر عمر گل بھی چیئر لیڈرز سے ناخوش ہیں۔پشاور کے نواحی علاقے نواں کلی جہاں سے پاکستان کے زیادہ تر اسکواش چیمپین پیدا ہوئے،عمرگل بھی اسی علاقے سے تعلق رکھنے والے روایتی آفریدی قبیلے کے پٹھان ہیں۔عمر گل کا خاندان اپنی روایات کے لئے مشہور ہے۔عمر گل کا کہنا ہے کہ میرے گھر میں ٹیلی وژن نہیں ہے۔جبکہ مرد حضرات حجرے میں ٹیلی وژن دیکھتے ہیں۔جب سے چیئر لیڈرز متعارف ہوئی ہیں ہمارے حجرے میں بھی ٹیلی وژن پر میچ نہیں دیکھا جاتا۔میں نے اپنے لئے ایک کیبل کنکشن لیا ہو ا ہے لیکن ٹیلی وژن پر جس طرح ناچ گانا دکھایا جاتا ہے میں اس کے خلاف ہوں۔عمر گل کے سنیئر ساتھی شاہد آفریدی بھی کہہ چکے ہیں کہ چیئر لیڈرز کی موجودگی سے گراؤنڈ میں کھلاڑیوں کی توجہ بٹ جاتی ہے۔عمر گل اور شاہد آفریدی نے ایک ساتھ کہا کہ یہ کرکٹ نہیں ہے کرکٹ کا اصل مزا روایتی کرکٹ ہے ۔جس طرح چیئر لیڈرز جس لباس میں پرفارم کرتی ہے اس لئے کوئی بھی اپنے گھر میں ٹیلی وژن پر فیملی کے ساتھ میچ نہیں دیکھ سکتا۔ عمر گل نے کہا کہ شاہ رخ خان کی ٹیم کے ساتھ کھیلنے کا تجربہ بہت اچھا رہا ۔ دنیا کے بہت بڑے اداکار ہماری بہت زیادہ حوصلہ افزائی کرتے ہیں، ہر ایک کو فون کرکے مبارک باد دیتے ہیں اور اس سے مسائل پر بات کرتے ہیں۔ عمر گل نے کہا کہ انڈین پر یمیئر لیگ کھیلنے کا تجربہ اچھا رہا میں کمرکی تکلیف سے صحت یاب ہوکر یہاں آیا تھا اور پورے ردہم کے ساتھ بولنگ کررہا ہوں ۔اب میری نظریں پاکستانی ٹیم کے ساتھ انٹر نیشنل سیزن پر مر کوز ہیں۔