ممبئی لاہور(اردوپوائنٹ سپورٹس ڈیسک17مئی 2008) انڈین پریمیئر لیگ میں ممبئی انڈینز نے کولکتہ نائٹ رائیڈرز کو 8 وکٹوں سے شکست دیکر اس کے سیمی فائنل تک رسائی کے لیے مزید رکاوٹ کھڑی کردی ہے ۔ وینکھا دے اسٹیڈیم میں کھیلے گئے میچ میں ممبئی انڈینز نے کولکتہ نائٹ رائیڈرز کو 67 رنز پر ڈھیر کر دیا۔ جواب میں ممبئی انڈینز نے مطلوبہ ہدف جے سوریا کی شاندار بیٹنگ کی بدولت چھٹے اوورز میں 2 وکٹوں کے نقصان پر پورا کر لیا۔ میزبان ٹیم نے ٹاس جیت کر فیلڈنگ کرنے کا فیصلہ کیا تھا۔ کولکتہ نا ئٹ رائیڈرز کو اننگز کے اسٹارٹ میں ہی مشکلات سے دوچار ہونا پڑا اور صرف 35 کے مجموعی اسکور پر6 کھلاڑی آؤٹ ہو گئے۔ اس موقع پر سارو کنگولی اور اجیت اگرکار نے اسکور کو آگے بڑھایا اور 55 کے اسکور پر کولکتہ کو ایک اور وکٹ کا نقصان گنگولی کی شکل میں اٹھانا پڑا جس کے بعد آنے والا کوئی بھی بیٹسمین ممبئی کے بولرز کا سامنا نہ کر سکا اورپوری ٹیم صرف 67 رنز بناکر آوٴٹ ہوگئی۔ کولکتہ کی جانب سے گنگولی اور اگرکار نے 15 ، 15 اور سلمان بٹ نے 13 رنز بنائے۔ ممبئی انڈینز کی جانب سے سب سے کامیاب بولر شان پولاک رہے جنہوں نے 3 کھلاڑیوں کا شکار کیا۔ ان کے علاوہ بریوو ، راجی اور تھارنلی نے دو دو کھلاڑیوں کو آوٴٹ کیا۔ جواب میں ممبئی انڈینزکو اننگز کی شروعات میں ہی سچن ٹنڈولکر کی وکٹ سے ہاتھ دھونا پڑا ۔جے سوریا نے شاندار کھیل کا مظاہرہ کیا اور تین چھکوں اور چھ چوکوں کی مدد سے 48 رنز بنائے۔ ممبئی کی جانب سے دوسری وکٹ اوتھاپا کی گری، انہوں نے 9 رنز بنائے۔ ممبئی انڈینز نے مطلوبہ ہدف چھٹے اوور میں حاصل کر لیا۔ کولکتہ کی جانب سے شعیب اختر اور شرما نے ایک ایک کھلاڑی کو آوٴٹ کیا