اورڈوس (سپورٹس ڈیسک) پہلی مینز ایشین ہاکی چیمپئنزٹرافی میں پاکستان اپنا پانچواں اور آخری میچ روایتی حریف بھارت کے خلاف آج کھیلے گا۔ چین کے شہر اورڈوس میں جاری ٹورنامنٹ میں آج آخری تین لیگ میچ کھیلے جائیں گے، پہلا میچ روایتی حریفوں پاکستان اور بھارت کے درمیان کھیلا جائے گا، یہ میچ دونوں ٹیموں کے لئے انتہائی اہمیت کا حامل ہے،پاکستانی ٹیم کو فائنل تک رسائی کیلئے بھارت کیخلاف ڈرا کی ضرورت ہے۔پاکستان کی ٹیم 9 پوائنٹس کے ساتھ سرفہرست ہے جبکہ بھارت کی ٹیم 8 پوائنٹس کے ساتھ دوسرے نمبر پر ہے۔ دوسرے میچ جنوبی کوریا اور چین کی ٹیمیں نبرد آزما ہوں گی، تیسرا میچ ملائیشیا اور جاپان کی ٹیموں کے درمیان کھیلا جائے گا۔ پاکستان ہاکی ٹیم کے منیجر خواجہ جنید احمد نے کہا ہے کہ بھارت کے خلاف میدان میں جیت کی نیت سے اتریں گے، کھلاڑیوں پر واضح کرچکے ہیں کہ ہم فتح کے ساتھ فائنل کھیلیں گے، کھلاڑی ڈرا کی حکمت عملی اختیار نہ کریں۔ایک انٹرویو میں انہوں نے کہا کہ جنوبی کوریا کے خلاف میچ اہم تھا جس میں کامیابی سے کھلاڑیوں کے حوصلے بلند ہوئے ہیں۔ جنوبی کوریا مضبوط ٹیم ہے اس کے خلاف ہمیں دباوٴ کا سامنا تھا۔ خواجہ جنید نے کہاکہ جاپان کے ہاتھوں ہار سے مایوسی ہوئی اس میچ میں کھلاڑی میچ پلاننگ کے تحت نہیں کھیلے، پاکستان کے کھلاڑیوں نے چھ یقینی گول ضائع کئے جبکہ پینلٹی کارنر میں بھی ہم فائدہ اٹھانے میں ناکام رہے۔ انہوں نے کہاکہ جاپان کی کارکردگی ٹورنامنٹ میں خاصی عمدہ رہی ہے اس نے بھارت کے خلاف ڈرا کھیلا جبکہ چین کو ناکامی سے دوچار کیا۔ خواجہ جنید احمد نے کہاکہ جدید ہاکی میں گول کے چانسز کم ملتے ہیں جو ٹیم آدھے درجن گول ضائع کرے گی وہ یقینی طور پر ناکامی سے دوچار ہوگی۔ انہوں نے کہاکہ بھارت کے خلاف میچ میں صرف روایتی حریف ہونے کا دباوٴ ہے۔ ٹورنامنٹ میں ہماری کارکردگی بھارت سے اچھی ہے، پاکستان نے تین میچز جیتے ہیں جب کہ بھارتی ٹیم کو دو میں کامیابی ملی ہے۔ انہوں نے کہا کہ بھارت کے خلاف ہم نے کامیابی کی حکمت عملی تیار کی ہے۔ انہوں نے کہاکہ پاکستان کی کوشش اور خواہش ہے کہ فائنل میں جاپان سے مقابلہ ہو اگر ہم نے بھارت کو ہرایا اور جاپان، ملائشیا سے جیت گیا تو پھر پاکستان اور جاپان فائنل میں مدمقابل ہوں گے۔