لاہور دھماکوں میں بھارت یا افغانستان ملوث ہے اس بارے میں تحقیقات کے بغیر کچھ نہیں کہاجا سکتا۔طارق پرویز ۔۔۔دونوں خود کش دھماکوں کا سراغ لگا لیا ہے جلد ملزموں تک پہنچ جائینگے ‘سیکورٹی اداروں کو بھی کامیابی مل رہی ہے ‘نجی ٹی وی سے گفتگو:
لاہور (اردوپوائنٹ اخبا ر تازہ ترین12 مارچ 2008 ) ڈائریکٹر جنرل ایف آئی اے طارق پرویز نے کہا ہے کہ لاہور میں ہونیوالے خود کش دھماکوں میں بھارت یا افغانستان ملوث ہے اس کے بارے میں تحقیقات کے بغیر کچھ نہیں کہا جا سکتا‘لاہور میں ہونیوالے دونوں خود کش دھماکوں کا سراغ لگا لیا ہے اور جلد ملزموں تک پہنچ جائینگے ۔ ملک میں ہونیوالے دہشتگرد ی کے واقعات روکنے اور ملزموں تک پہنچے میں سیکورٹی اداروں کو بھی کامیابی مل رہی ہے ۔ وہ گزشتہ روز لاہور میں نجی ٹی وی سے گفتگو کر رہے تھے ۔ طارق پرویز نے کہا کہ سیکورٹی اداروں نے سرگودھا اور راولپنڈی میں ہونے والے خود کش دھماکوں کے ملزموں کو گرفتار کر لیا ہے اور لاہور میں ہونیوالے خود کش دھماکوں کے ملزموں کا بھی سراغ مل چکا ہے اور جلد ان کے نیٹ ورک تک پہنچ جائینگے ۔ انہوں نے کہا کہ یہ بات درست ہے کہ دہشتگردی کرنیوالے عناصر بڑے تجربہ کار ہیں اور وہ ہر روز نئے طریقے دریافت کر رہے ہیں اور لاہو رمیں ہونیوالے خود کش دھماکوں میں 1999ء کے بعد پہلی مرتبہ بارود سے بھری گاڑیوں کے ذریعے خود کش دھماکے کے گئے ہیں ۔ انہوں نے کہا کہ یہ درست نہیں کہ دھماکے کے وقت بلڈنگ میں اسلام آباد سے گرفتار ہونے والے دھماکوں کے ملزم موجود تھے ۔ انہوں نے کہا سیکورٹی والوں کی وجہ سے دھماکے نہیں ہو رہے بلکہ حقیقت یہ ہے کہ سیکورٹی اداروں نے بھی اب تک حملے کرنے والے کئی نیٹ ورکوں کو پکڑا ہے اور ان سے تفتیش جاری ہے ۔